Արգիշտի Քյարամյանի «թաքցրած» բնակարանի հետքերով․ ի՞նչ է որոշել Էթիկայի հանձնաժողովը

Բարձրաստիճան պաշտոնատար անձանց էթիկայի հանձնաժողովը հուլիսի 8-ի որոշմամբ Պետական վերահսկողական ծառայության պետի պաշտոնակատար Արգիշտի Քյարամյանի նկատմամբ վարույթ էր հարուցել «Վարչական իրավախախտումների վերաբերյալ» օրենսգրքի 169.28-րդ հոդվածի 5-րդ մասով (հայտարարատուի կողմից հայտարարագրում անզգուշությամբ ոչ ամբողջական տվյալ ներկայացնելը) նախատեսված առերևույթ իրավախախտման հատկանիշներով։

Բարձրաստիճան պաշտոնատար անձանց էթիկային հանձնաժողովը, սակայն հուլիսի 8-ին իր կողմից հարուցած վարույթը հուլիսի 15-ին կարճել է։

«15.07.2019թ. որոշմամբ վարչական իրավախախտման վերաբերյալ թիվ ՎԻՎ/85/2019 գործի վարույթը կարճվել է՝ այն հիմնավորմամբ, որ ՀՀ պետական վերահսկողական ծառայության պետի պաշտոնակատար Արգիշտի Քյարամյանը Երևան քաղաքի Մ. Մելիքյան փողոցի 16-րդ շենքի 36-րդ բնակարանի նկատմամբ սեփականության իրավունք է ձեռք բերել ՀՀ ժողովրդական պատգամավորների Երևան քաղաքի խորհրդային շրջխորհրդի գործադիր կոմիտեի՝ 30.01.1995թ. 5/4 թվակիր որոշման հիման վրա, այսինքն՝ քննարկման առարկա դարձրած բնակարանի նկատմամբ սեփականության իրավունքը Ա.Քյարամյանը ձեռք է բերել 4 տարեկան հասակում, այն էլ՝ օրենքի ուժով (առանց բնակարանը օտարելու գործընթացի)»,- տեղեկացնում է փաստաբան Գևորգ Գևորգյանը։

Բարձրաստիճան պաշտոնատար անձանց էթիկայի հանձնաժողովն առաջարկել է Արգիշտի Քյարամյանին ուղղումներ կատարել իր գույքի և եկամուտների վերաբերյալ հանձնաժողով ներկայացրած հայտարարագիրը։

Հիշեցնենք, որ Արգիշտի Քյարամյանի նկատմամբ վարույթը հարուցվել է Փաստերի ստուգման հարթակի (Fip.am) հրապարակման հիման վրա։ Հուլիսի 5-ին կայքը «Արգիշտի Քյարամյանի հայտարարագիրն ամբողջական չէ. թաքցված բնակարանի հետքերով» վերնագրով հետաքննություն էր հրապարակել ներկայացնելով, որ Արգիշտի Քյարամյանի կողմից ներկայացված հայտարարագրերում առկա կեղծ տվյալներ կան և նա թաքցված բնակարան ունի, որը չի արտացոլվում հայտարարագրում:

Աղավնի Սուքիասյան