21.05.2026 | 23:30
Հայաստանի մի շարք հասցեներում էլեկտրաէներգիայի անջատումներ կլինեն
Կոտայքի մարզպետը «միֆեր է կոտրում», իսկ Նոր Գեղիի նախկին ղեկավարը չի հասկանում՝ ինչ խնդիր կա 18 փողոց իր անվամբ կոչելու մեջ
Քաղաքականություն
17.07.2019 | 17:14
Կոտայքի մարզպետ Ռոմանոս Պետրոսյանը դիմել է վարչական դատարան՝ պահանջելով անվավեր ճանաչել Նոր Գեղի համայնքի ավագանու կայացրած որոշումներից մեկը, որով Նոր Գեղիի 18 փողոցներ անվանակոչվել են 1986-2019 թթ. համայնքի ղեկավարի պաշտոնը զբաղեցնող Ֆրոնտիկ Թևոսյանի անունով։
Factor.am-ի հետ զրույցում Ֆրոնտիկ Թևոսյանն ասաց, որ չի հասկանում՝ ինչո՞ւ է Կոտայքի մարզպետը Նոր Գեղիի խնդիրները թողել ու ընկել փողոցների անունների հետևից։
32 տարի Նոր Գեղին ղեկավարած նախկին համայնքապետը նորմալ է համարում գյուղի 18 փողոցներն իր անունով կոչելը։
«Ի՞նչ ա սա տալու իրեն: 2015 թվականին, ավագանու որոշմամբ, փողոցներն անվանակոչել են իմ անունով: Էդ որոշումն այն ժամանակ անցել ա մարզպետարանով, Տարածքային կառավարման և զարգացման ու Արդարադատության նախարարություններով: Թող չթողնեին, մենք էլ չէինք անվանակոչի։ Իսկ թե հիմա էդ մարդը Նոր Գեղիի հազար պրոբլեմը թողած՝ ինչո՞ւ է ընկել էդ փողոցների հետևից, չեմ կարող ասել»,- նշեց Ֆրոնտիկ Թևոսյանը։
2018 թվականի թավշյա հեղափոխությունից հետո ՀՀԿ-ն լքած Թևոսյանը պնդում է՝ մարզպետը, նախքան փողոցների հետևից ընկնելը, պետք է հիշեր, որ ինքը համայնքը ղեկավարել է 32 տարի, իսկ բնակիչները դեմ չեն եղել այդ անվանակոչությանը:
«Հիմա ինչ է՝ էս փողոցներում ապրող 1.500 մարդուն պետք է տանեն ու կանգնեցնեն հասցեափոփոխության առա՞ջ, էլ բան ու գործ չունե՞ն»,- ասաց Թևոսյանն ու շարունակեց. «Օգոստոսին ասեց՝ դիմում գրի, գրեցի դուրս եկա, իր սանիկին բերեց, դարձրեց Նոր Գեղիի ղեկավար։ Իսկ թե նա ոնց է աշխատում, կարող եք գալ և ժողովրդին հարցնել, նրանք կասեն: 2019 թվականի հոկտեմբերին խոշորացում է լինելու, կնայենք, կտեսնենք՝ արդյոք կկարողանա՞ մարզպետի սանիկը նորից ընտրվել»:
Կոտայքի մարզպետ Ռոմանոս Պետրոսյանը Նոր Գեղիի երկարամյա համայնքապետին հիշեցնում է՝ համայնքում 18 մեծ ու փոքր փողոցների անվանակոչության հետևից ընկել է մեկ պատճառով՝ համայնքներում անձի պաշտամունք-միֆը պետք է ջարդել։
«Մեզ համար մեծ ու փոքր խնդիրներ չկան: Եթե մի համայնքում 32 տարի նույն մարդն է ղեկավարել և իր անունով ունի 18 անվանակոչված փողոց, դա վկայում է կառավարման մշակույթում առկա խնդիրների մասին, և մենք մեր քայլով բերում ենք կառավարման նոր մշակույթ: Անձի պաշտամունքի միֆը պետք է ջարդել ու անձակենտրոն կառավարումից անցնել ինստիտուցիոնալ կառավարման և ինստիտուտների կայացման»,- Factor.am-ի հետ զրույցում ասաց Կոտայքի մարզպետը։
Նա հակադարձեց նաև Ֆրոնտիկ Թևոսյանին. համայնքի նոր ղեկավարն իր սանիկը չէ, իր հետ որևէ ազգակցական կապ չունի:
«Նոր ընտրված համայնքի ղեկավարի հետ որևէ ազգակցական, բարեկամական և ընկերական կապ չունեմ: Նա եղել է քաղաքական թիմի ներկայացուցիչը, որը 120 ձայնի տարբերությամբ ընտրվել է համայնքի ղեկավար, ով զբաղված է ոչ թե սեփական բարեկեցության ապահովմամբ, այլ այդ համայնք ներդրումներ ներգրավելով, համայնքում խաղահրապարակների հիմնումով ու բնակֆոնդի վերափոխումով»,- ասաց Ռոմանոս Պետրոսյանը։
Հիշեցնենք, որ Ֆրոնտիկ Թևոսյանին Նոր Գեղիի համայնքապետի պաշտոնում 2019 թվականի փետրվարի 25-ից փոխարինում է Վարդան Պապյանը:
Աղավնի Սուքիասյան
