03.04.2026 | 23:13
NASA-ն հրապարակել է Երկրի նոր լուսանկարը
Ունենք քրեակատարողական հիմնարկ, որտեղ ընդհանրապես բժիշկ չկա․ Արման Թաթոյան
Հասարակություն
17.07.2019 | 12:08
Մարդու իրավունքների պաշտպան Արման Թաթոյանն այսօր՝ հուլիսի 17-ին, հրապարակեց փակ հաստատություններում մարդու իրավունքների վիճակը և ներկայացրեց Պաշտպանի նախաձեռնությամբ մշակված «Ազատազրկվածի իրավախորհրդատու» ավտոմատացված համակարգը Facebook սոցիալական ցանցի Messenger հավելվածում։
Ըստ Արման Թաթոյանի՝ պաշտպանի աշխատակազմն ուսումնասիրություն է կատարել մի նոր ուղղությամբ՝ խոշորացույցի տակ պահելով դատարաններում ազատությունից զրկված անձանց ժամանակավոր պահելու խցերը։
«Օրինակ՝ դատարանի շենքեր են տեղափոխվում կալանավորված անձինք որոշակի գործողությունների ենթարկվելու համար, իսկ կան դատարաններ, որտեղ այս նպատակով առանձնացված հատուկ խցեր չկան․ այդպիսիք են, օրինակ, Շիրակի մարզի ընդհանուր իրավասության դատարանի Աթիկի և Աշոցքի, Գեղարքունիքի մարզի ընդհանուր իրավասության դատարանի՝ Գավառի և Մարտունու ու Սյունիքի մարզի Սիսիան քաղաքի նստավայրերը։ Հատուկ խցերի բացակայելու պատճառով նիստերն անցկացվում են այլ քաղաքներում»,- ասաց Արման Թաթոյանը՝ նշելով, որ չկան համակարգված կարգավորումներ նաև ՔԿՀ-ից դատարանի շենք տեղափոխվող անձի սննդի ապահովման հարցում։
Մարդու իրավունքների պաշտպանը խոսեց նաև ՔԿՀ-ների խնդիրներից ամենահրատապ լուծում պահանջող հարցերից մեկի՝ բժշկական ծառայությունների մատուցման և բժշկական անձնակազմի ինստիտուցիոնալ անկախության մասին։
«Այսօր ՔԿՀ-ներում պահվող անձինք չեն վստահում բժիշկներին և դա պայմանավորված է նրանով, որ տարիներ ի վեր բժիշկը դիտարկվել է որպես ուսադիրներով մարդ՝ զրկված լինելով վստահությունից։ Իհարկե՛, Կառավարությունը անցյալ տարի ընդունեց որոշում քրեակատարողական հիմնարկներում բժշկության կենտրոն ունենալու մասին, սակայն, այդ որոշումն այդպես էլ մնաց միայն թղթի վրա»,- ասաց Արման Թաթոյանը՝ կարևորելով նաև ՔԿՀ-ներում կոնկրետ մասնագիտություններով բժիշկների պակասի հարցը։
«Ունենք նաև մասնագիտացված բժիշկների խնդիր։ Ունենք նաև այնպիսի ՔԿՀ, որտեղ բժիշկներ չկան ընդհանրապես։ Շատ լուրջ խնդիր է նաև այն, որ բժիշկները չեն վերապատրաստվում, իսկ սոցիալական ցածր երաշխիքների և աշխատավարձի ցածր լինելու պատճառով հնարավոր չի լինում համակարգ ներգրավել որակյալ մասնագետներ, իսկ առկա մասնագետների պարագայում էլ՝ ապահովել բարձր պատրաստվածության մակարդակ»,- ասաց նա:
Աղավնի Սուքիասյան
