Հասարակություն
16.07.2019 | 20:26«Իրավունքների պաշտպանություն առանց սահմանների» ՀԿ նախագահ Հայկուհի Հարությունյանը Factor.am-ի հետ զրույցում անդրադառնալով գնահատականներին, թե «Իրավական ուղի» ՀԿ-ի հրապարակած՝ Վենետիկի հանձնաժողովի նիստի արձանագրության մեջ հանձնաժողովն արհեստական է համարում ՍԴ անդամ և ՍԴ դատավոր տարանջատումը, ինչպես նաև մտահոգված է Վահե Գրիգորյանի հայտարարությամբ, ասաց, որ գոնե օրիգինալ փաստաթղթում հանձնաժողովը մտահոգություն է հայտնում միայն այն առիթով, որ նման հայտարարություններն ԱԺ-ում կարող են դիտարկվել որպես միջամտություն ՍԴ գործունեությանը:
Իրավապաշտպանը կարծում է՝ ՀՀ քաղաքացին պետք է իմանա, թե ով է վեթինգի, ՍԴ ճգնաժամի հարցերը Վենետիկի հանձնաժողովի քննարկման առարկա դարձրել։ «Նիստի օրակարգը ներկայացվում է անդամ պետությունների ներկայացուցիչների առաջարկով, ովքեր ուզում են, որ իրենց պետության այս կամ այն գործընթացի մասին տեղյակ լինի մասնագիտական խումբը։ Այդ տեղեկությունները ներկայացվել են անդամների կողմից, ով մասնակցել է: Չի համոզում, որ դա Վարդան Պողոսյանի կարծիքը չէ»,- նշեց իրավապաշտպանը՝ հավելելով, որ ուզում է այդ առիթով բացատրություն ստանալ ՀՀ իշխանություններից:
«Պաշտպանել Վարդան Պողոսյանին՝ ես դրա անհրաժեշտությունը չեմ տեսնում։ Ինձ համար դա հնչում է պաշտպանություն»,- ասաց իրավապաշտպանը՝ անդրադառնալով ԱԺ պետաիրավական հարցերի հանձնաժողովի նախագահ Վլադիմիր Վարդանյանի հայտարարությանը, թե դա ոչ թե Վարդան Պողոսյանի կարծիքն է, այլ հանձնաժողովի արձանագրությունը:
Պետական որևէ կառույց, այդ թվում՝ ԱԺ-ն, մինչ այժմ կարծիք չի հայտնել Սահմանադրական ճգնաժամի առիթով. պատգամավորներն արձակուրդում են: Հարցին՝ դա անհոգությո՞ւն է ՍԴ ճգնաժամի հանդեպ, Հարությունյանն ասաց. «Կարծում եմ՝ ավելի տեղին կլիներ օգտագործել անգործությունը, ոչ թե անհոգությունը, ինչը բացարձակ չի բխում հետհեղափոխական դատաիրավական բարեփոխումների մոտեցումներից։ Դա ոչ պատշաճ և ոչ հարիր պատասխան եմ գնահատում։ Բացարձակ հարիր չէ հետհեղափոխական իշխանությանը՝ անգործությունն արդարացնել արձակուրդի մեջ գտնվելով»:
Իրավապաշտպանի խոսքով՝ հանրությանը պետք է բացատրվի, թե ինչու Վենետիկի հանձնաժողովում մինչ այժմ ՀՀ-ն ներկայացնում են նախկինները՝ այնտեղ ՀՀ-ն ներկայացնում են նախկին իշխանության ներկայացուցիչ Գագիկ Հարությունյանն ու սահմանադրագետ Վարդան Պողոսյանը: «Ինչու չեն փոխարինել անդամներին»,- հարց ուղղեց նա։
Վենետիկի հանձնաժողովի շուրջ կատարվածը, ըստ Հարությունյանի, ներկա իշխանության անգործության արդյունք է:
Հրապարակված փաստաթղթից պարզ դարձավ, որ ՀՀ իշխանությունը հրաժարվել է վեթինգից, ինչի մասին հայտարարել էր վարչապետը, փոխարենը ընտրելով դատաիրավական բարեփոխումների ուղին։ Հայկուհի Հարությունյանը կասկածելի համարեց այս պնդումը՝ հայտարարելով, որ որպես անցումային արդարադատության գործիք՝ վեթինգը ներկայացված է ԱՆ կայքում. «Եվ Եթե տեղի է ունեցել մոտեցումների փոփոխություն, պետք է բացատրվի, թե ինչու, որովհետև նման գործելաոճն ընդունելի չէ հետհեղափոխական իշխանության կողմից»։
Հարցազրույցն ամբողջությամբ՝ տեսանյութում:
Մարինե Խառատյան
