15.01.2026 | 19:15
Լիտրը 270 դրամ․ ինչու է հեղուկ գազը օր օրի թանկանում. ՏԵՍԱՆՅՈՒԹ
Գյուղապետը պնդում է, որ Շիրակի մարզում 8 տարի աղջկան բռնությամբ պահելու մասին տեղեկությունը չի համապատասխանում իրականությանը
Հասարակություն
16.07.2019 | 17:08
Նախօրեին ՀՀ ոստիկանությունը հայտարարություն էր տարածել, որ թրաֆիքինգի դեպք է բացահայտվել։ Շիրակի մարզի գյուղերից մեկում տեղի բնակիչներից մեկը 2011թ-ից ՝ արդեն 8 տարի, երիտասարդ մի աղջկա ենթարկել է աշխատանքային շահագործման։ Մասնավորապես, տղամարդը աղջկա նկատմամբ բռնություն գործադրելու սպառնալիքով պահել է գոմում և առանց վճարի աշխատեցրել։ Աղջիկը պատմել է, որ մի քանի անգամ փորձել է փախչել, սակայն տղամարդը միշտ նրան գտել է, բերել գոմ ու ծեծել՝ սպառնալով, որ կրկնվելու դեպքում կսպանի։ Հունիսի 18-ին աղջկան վերջապես հաջողվել է փախչել։
Factor.am-ը պարզեց, որ այդ ամենը կատարվել է Շիրակի մարզի Մարմաշեն համայնքում։ Մեզ հետ զրույցում Մարմաշեն համայնքի ղեկավար Կարեն Արշակյանը հավաստիացրեց, որ տարածված տեղեկությունը իրականությանը չի համապատասխանում․ աղջիկը միշտ էլ ապրել է ազատության մեջ, և նրան ոչ ոք բռնության չի ենթարկել։ Գյուղապետի ներկայացմամբ՝ աղջիկն աշխատել է Մարմաշենի բնակիչ Ռուբենի անասնաֆերմայում՝ որպես հովիվ։
«Ես լսեցի նաև մեղադրում են սեռական բռնության և այդպիսի բաների մեջ, փակի տակ պահել և այլն․․․ իրականում նա ազատ ապրել է, արգելանք չի եղել՝ ոչ տեղաշարժվելու և ոչ մի բանի։ Ինքն օգտվել է խանութից, ունեցել է գումար, ես տեսել եմ, որ միշտ մտել է խանութից ինչ պետք է՝ վերցրել է, չգիտեմ ինչ չափով աշխատավարձ է ստացել, բայց տեսել եմ, որ մտել է խանութ։ Գյուղում հովիվ աղջիկը ազատ ման է եկել։ Մի անգամ հիվանդանոցում նաև տեսել եմ, որ եկել էր հարևանի հարսին տեսնելու։ Ամեն օր անասուններին տարել է հանդ, եկել է։ Ի՞նչ է նշանակում մարդուն անազատության մեջ են պահել կամ թրաֆիքինգի ենթարկել, այնպիսի բառեր են օգտագործում, որոնց հետ համաձայն չեմ»,- հայտարարեց Կարեն Արշակյանը։
Համայնքապետի խոսքով՝ հովիվ աղջիկը չի եղել ոչ մեկի հսկողության տակ, ազատ ման է եկել և եթե մտադրություն ունենար՝ ցանկացած տեղ կարող էր գնալ։
«Ես չեմ տեսել, որ մարդուն ճաղերի ու վանդակների մեջ պահեն։ Ապրել է ֆերմային հարակից տարածքում։ Ինքըն առանձին է մնացել, այդ մարդկանց տունը հեռու է ֆերմայից, ոչ էլ փակի տակ է եղել, ցանկացած պահի կարող էր այնտեղից գնալ»,- ասաց Կարեն Արշակյանը՝ հավելելով, որ չգիտի, թե ինչպես է աղջիկը հայտնվել գյուղում։
Մարմաշեն համայնքի ղեկավարի փոխանցմամբ՝ ֆերմեր Ռուբենը, ում մոտ աշխատել է հովիվ աղջիկը, նորմալ ընտանիքից է, հայրը մահացել է մոտ 10-ը տարի առաջ, մայրն ու քույրն էլ նորմալ, աշխատող, հավասարակշռված մարդիկ են։
Նշենք, որ դեպքի առթիվ քրեական գործ է հարուցվել և ուղարկվել Քննչական կոմիտե, իրականացվում է նախաքննության: Իրավապահները եկել են նաև գյուղ և տեղում ծանոթացել գործի հանգամանքներին։
«Մեր մոտ եկել են իրավապահները, նայել են, ես էլ եմ եղել, հարցումներ են արել։ Նաև իրենք են զարամացած այս իրավիճակից»,- ներկայացրեց Մարամաշեն համայնքի ղեկավարը։
Էմմա Չոբանյան
