Պլան է դրված․ ասում են՝ չեք հասցնում, գիծը հանձնեք․ երթուղու տնօրենը Երևանի քաղաքապետի հետ հանդիպում է պահանջում

Թիվ 28 երթուղու տնօրեն Վլադիկ Աբրահամյանը Երևանի քաղաքապետ Հայկ Մարությանից հանդիպում է ակնկալում Երևան քաղաքը սպասարկող երթուղու տնօրենների հետ՝ նրանց խնդիրները լսելու և դրանց համար լուծման եզրեր գտնելու համար։

«Քաղաքապետը պետք է մեզ հետ հանդիպի, տեսնենք նոր մեքենաներ բերե՞նք, թե՝ չէ»,- պնդում է Աբրահամյանը։

Երթուղու տնօրենի խոսքով՝ տարիներ շարունակ երթուղիների տնօրենները ստիպված են լինում գումար վճարել իրենց երթուղու՝ անգամ այն մեքենաների համար, որոնք չեն աշխատում։

«Անձամբ ինձ պատկանող երթուղում տասից ավելի մեքենա չէր աշխատում, և, փաստորեն, նախատեսված թվից պակաս էր, և ես չէի կարողանում պարկը համալրել նոր ավտոբուսներով, որովհետև նվազագույնը 7 000-80000 դոլար էր պետք մեկ մեքենա ձեռք բերելու համար։ Ես գումար չունեի, չկարողացա երթուղին անհրաժեշտ ավտոբուսներով համալրել, բայց օրենքը պահանջում է, որ անգամ չաշխատած մեքենայի համար էլ պետական գումար մուծես, ինչի արդյունքում ինձ վրա դրվեց 40 հազար դոլարի տուգանք, որն այս պահին ես վիճարկում եմ դատարանում»,- ասում է նա ու հավելում՝ բացի տուգանքից կանգնած է նաև վարորդներ գտնելու խնդրի առաջ։

Վերջինս հանդիպել է Երևանը սպասարկող բոլոր երթուղիների տնօրենների հետ ու ունեցած զրույցներից պարզել՝ նրանք ևս վարորդի կարիք ունեն:

«Եթե հաշվենք, որ Երևանը սպասարկում է 100 երթուղի, իսկ յուրաքանչյուր երթուղու տնօրեն հայտնում է, որ ունի 7-8 վարորդի պակաս, ապա կարող ենք արձանագրել, որ կա մոտ 800 վարորդի պակաս։ Վարորդները գնում են Ռուսաստանում են վարում»,- ասում է Աբրահամյանը՝ նշելով, որ եթե անգամ վարկ վերցնելով կարողանա համալրել իր երթուղու պակաս ավտոբուսների քանակը, ամենամեծ խնդիրը վարորդ գտնելն է մնում։

«Իսկ մեզ վրա պլան է դրված․ ասում են՝ չեք կարողանում համալրել, չեք հասցնում, գիծը հանձնեք»,- նշում է  Աբրահամյանը։

Ասուլիսի ընթացքում երթուղու տնօրեն Վլադիկ Աբրահամյանն անդրադարձավ մեկ այլ խնդրի ևս՝ տուգանքների ենթարկված վարորդները  չեն գալիս աշխատանքի, իսկ տուգանքը ստիպված է լինում վճարել երթուղու տնօրենը։

«Գնում ենք «Երևանտրանս», ասում ենք այս վարորդը աշխատանքից փախել է, իր հետ կնքված աշխատանքային պայմանագիրը լուծարեք, իրենք էլ լուծարում են։ Ես չգիտեմ, թե ինչ հիմքով  են լուծարում, բայց ես ինչի՞ պետք է իրենց տուգանքները մուծեմ»,- նեղսրտում է Աբրահամյանը։

Լրագրողի դիտարկմանը՝ իսկ ի՞նչ հիմքով է «Երևանտրանսը» աշխատում, իր բնորոշմամբ, աշխատանքից ու տուգանքից փախած վարորդների հետ, հավելում է․ «Հաշվապահը գալիս է «Երևանտրանս»,  էնտեղ ձևակերպում են, որ այս կամ այն վարորդին հանում են աշխատանքից։ Աշխատանքային գրքույկում գրում են, որ նա հեռացվում է աշխատանքից ֆինանս չմուծելու կամ աշխատանքից փախնելու համար»։

Հարցին՝ քանի ժամ են աշխատում իրեն պատկանող երթուղու վարորդները, Վլադիկ Աբրահամյանը  նշում է. «Օրենքով աշխատել հնարավոր չէ: 8-9 ժամ են աշխատում, բայց մենք վարորդին չենք ասում աշխատի, ասում ենք պլան ունես քո վրա դրած 140 հազար դրամ, դա 10 օր շուտ մուծեք, գնացեք հանգստացեք, շուտ տուր՝ գնա հանգստացի։ Օրենք հնարավոր չէ տրանսպորտում կիրառել, եկեք դիսերտացիաներ էստեղ մի պաշտպանեք։ Առաջարկում եմ, որ քաղաքապետը հանդիպում կազմակերպի մեզ հետ ու հասկանա, ինչ պետք է անել․ մեզ ասում են վերանորոգեք ձեր մեքենաները և դրանք շահագործեք: Հանդիպենք հասկանանք՝ ինչ ենք անում»։