15.01.2026 | 21:00
Ադրբեջանի հարձակումը կլինի ԱՄՆ-ի շահի դեմ․ ՀՀ է գալիս ամերիկյան ֆինանսը և տնտեսական շահը․ Արմինե Մարգարյան․ ՏԵՍԱՆՅՈՒԹ
Եվրոպական հանձնաժողովը պատրաստ է բազմակողմ աջակցության ցուցաբերել Հայաստանին. Արթուր Դավթյանն ընդունել է ԵՀ պատվիրակությանը
Հասարակություն
09.07.2019 | 21:43
ՀՀ գլխավոր դատախազ Արթուր Դավթյանն այսօր ընդունել է Եվրոպական հանձնաժողովի հարևանության հարցերով գլխավոր տնօրինության Հայաստանի, Ադրբեջանի և Արևելյան գործընկերության հարցերով բաժնի ղեկավար Վասիլիս Մարագոսի գլխավորած պատվիրակությանը: Այս մասին տեղեկանում ենք դատախազության մամուլի ծառայությունից:
«Ողջունելով հյուրերին՝ ՀՀ գլխավոր դատախազը նշել է, որ Եվրոպական հանձնաժողովը կարևոր դերակատարում ունի Արևելյան գործընկերության երկրներում, մասնավորապես Հայաստանում ժողովրդավարական ինստիտուտների կայացման, մարդու իրավունքների պաշտպանության և արդարադատության համակարգի զարգացմանն ուղղված նախագծերի իրականացման գործընթացներում: Այս տեսակետից, ըստ Արթուր Դավթյանի, հանգուցային նշանակություն ունի հատկապես Հայաստանի Հանրապետության և ԵՄ-ի միջև ստորագրված Համապարփակ եւ ընդլայնված գործընկերության համաձայնագիրը, որով նախանշված են նշված ոլորտներում ռազմավարական բարեփոխումների հիմնական ուղղություններն ու նպատակները: Վերջիններիս նշանակությունն ընդգծվում է հատկապես նախորդ տարվա ընթացքում տեղի ունեցած հասարակական-քաղաքական շրջադարձային փոփոխություններից հետո Հայաստանում սկսված կոռուպցիայի դեմ պայքարի, դատաիրավական համակարգի լայնածավալ բարեփոխումների լույսի ներքո:
Պատվիրակության ղեկավար Վասիլիս Մարագոսը շնորհակալություն է հայտնել ընդունելության համար և նշել, որ Եվրոպական հանձնաժողովը պատրաստ է բազմակողմ աջակցության ցուցաբերել Հայաստանին՝ սկսած բարեփոխումների իրականացման գործընթացում՝ ելնելով Հայաստանի իշխանությունների և հասարակության սահմանած առաջնահերթություններից ու մարտահրավերներից:
Հանդիպման ընթացքում քննարկվել է կոռուպցիայի հակազդման և դատաիրավական ոլորտի բարեփոխումների ռազմավարության մշակման, հետագա իրականացման գործընթացներում ՀՀ դատախազության մասնակցության և սպասելիքների, քրեական դատավարության շրջանակներում մարդու իրավունքների և ազատությունների պաշտպանության առավել գործուն մեխանիզմների կիրառման, դրանց շրջանակներում ԵՄ-ի կողմից կարճաժամկետ և միջնաժամկետ օժանդակության եղանակներին, համագործակցության հետագա զարգացման ուղիներին վերաբերող հարցերի լայն շրջանակ:
ՀՀ գլխավոր դատախազը շեշտել է, որ Հայաստանը, ի դեմս ՀՀ գլխավոր դատախազության, գործնական քայլեր է կատարում նաև քրեական դատավարության մասնակիցների իրավունքների պաշտպանության իրավակիրառ պրակտիկան եվրոպական իրավունքի զարգացման տենդենցներին համապատասխանեցնելու ուղղությամբ: Այդ համատեքստում առանձնացվել է հատկապես դատախազության կողմից այլընտրանքային խափանման միջոցների, մասնավորապես տնային կալանքի ինստիուտի ներդրմանն ուղղված օրենսդրական համապատասխան փոփոխությունների նախագծի շրջանառումը: Արթուր Դավթյանն առաջարկել է համագործակցության շրջանակներում դիտարկել նաև նշված խափանման միջոցի ներդրման համար անհրաժեշտ տեխնիկական օժանդակության հնարավորությունը, որն էապես կնվազեցնի խափանման միջոց կալանքի կիրառման դեպքերը:
Հանդիպման ընթացքում պայմանավորվածություններ են ձեռք բերվել շարունակել քննարկումները՝ հետագա գործակցության օպտիմալ եղանակների, մեթոդների շուրջ»,- ասված է հաղորդագրությունում:
