13.08.2026 | 01:00
ՊՍԺ-ն` Եվրոպայի Սուպերգավաթի հաղթող. ՏԵՍԱՆՅՈՒԹ
Ո՞րն է եղել «Վեդի Ալկոյի» սեփականատիրոջ ու նրա որդիների մասնակցությամբ ծեծկռտուքի պատճառը. մանրամասնում է Մանվել Ղազարյանը
Հասարակություն
08.07.2019 | 12:39
ԱԺ նախկին պատգամավոր, «Վեդի Ալկո»-ի սեփականատեր Մանվել Ղազարյանը չի հերքում, որ հունիսի 7-ին միջադեպ է տեղի ունեցել: Այս մասին գործարարն ասաց Factor.am-ի հետ զրույցում:
Երևանում հուլիսի 7-ին, հիշեցնենք, ծեծկռտուք է տեղի ունեցել, որին մասնակցելու կասկածանքով բերման են ենթարկվել Մանվել Ղազարյանն ու նրա որդիները՝ Դավիթ և Գառնիկ Ղազարյանները: Ծեծկռտուքի հետևանքով թիվ 1 համալսարանական հիվանդանոց է տեղափոխվել 2 քաղաքացի, որոնցից մեկն ունեցել է քթոսկրի կոտրվածք, գլխուղեղի ցնցում, իսկ մյուսը՝ աջ մասի պարանոցային վնասվածք։
Մամուլի հրապարակումների համաձայն՝ ծեծկռտուքին մասնակցած քաղաքացիները բերման են ենթարկվել Պուշկինի 21/3 հասցեից՝ ժամը 01:25-ի սահմաններում:
Factor.am-ի հետ զրույցում Մանվել Ղազարյանը չհերքեց, որ միջադեպ է եղել: «Ես ուղղակի վերջում հայտնվել եմ, ձայնի վրա եկել եմ, որ բաժանեմ իրարից: Ես կռվին մասնակից չեմ եղել, բայց ճիշտ է, որ ինձ էլ են բաժին հրավիրել»,- ասաց նա։
Հարցին՝ իր որդիները ինչո՞ւ են ծեծի ենթարկել քաղաքացիներին, ո՞րն է եղել կռվի պատճառը, Ղազարյանը պատասխանեց. «Կռվին նրանք մասնակցել են։ Ոնց բնութագրեմ, եթե մեկը մտնի իր տան բակ ու տեսնի, որ այնտեղ մեկ այլ մարդ իր կարիքներն է հոգում, ինչ եք կարծում՝ ի՞նչ կանի։ Դրանից էլ էդ վեճն ու կռիվը եղել է։ Այլ մանրամասներ հետո պարզ կլինեն, կիմանաք»:
Նշենք, որ փաստի առթիվ նյութեր են նախապատրաստվում:
Լիլիթ Շաբոյան
