23.07.2026 | 23:09
27 հայ զինծառայող ավարտել է բրիտանական հրահանգիչների պատրաստման դասընթացը
Մարիինյան թատրոնի աշխատակցուհու սպանության մեջ մեղադրվող ՀՀ քաղաքացուն մահացած են գտել
Հասարակություն
04.07.2019 | 18:23
Մարիինյան թատրոնի 93-ամյա աշխատակցուհի Նինա Մացինայի սպանության մեջ մեղադրվող ՀՀ քաղաքացի Սենիկ Նարոյանին, որին Սանկտ Պետերբուրգի քաղաքային դատարանի դատավորները մեղավոր էին ճանաչել, մահացած են գտել։ Այս մասին հայտնում է ՏԱՍՍ-ը՝ վկայակոչելով Ռուսաստանի իրավապահ մարմիններին։
Նարոյանին մահացած են գտել Սանկտ Պետերբուրգի քաղաքային դատարանի՝ պահակախմբի սենյակում։
Դատավճռի հրապարակումից հետո Նարոյանին և գործով ևս երկու ամբաստանյալի՝ Գալինա Հուսեյնովային և Ռազմիկ Հակոբյանին, որոնց նույնպես դատարանը մեղավոր է ճանաչել, տեղափոխել են պահակախմբի սենյակ, որտեղ նրանք սպասել են մեկուսարան տեղափոխվելուն։
Նախնական տեղեկություններով՝ Հուսեյնովային և Հակոբյանին մեկուսարան են տեղափոխել, իսկ Նարոյանը դեռ սպասել է սենյակում: Կեսգիշերին Նարոյանի պաշտպանը նրան մահացած է գտել:
Նշենք, որ Մարիինյան թատրոնի ամենատարեց աշխատակցուհու դին հայտնաբերվել էր 2017 թվականի նոյեմբերի 21-ին, Վարշավյան փողոցի տներից մեկում: Իրավապահներն օպերատիվորեն ձերբակալել էին ՀՀ երկու քաղաքացու՝ Ռազմիկ Հակոբյանին և Սենիկ Նարոյանին, ինչպես նաև բարեգործական հասարակական կազմակերպություններից մեկի աշխատակցուհի Գալինա Հուսեյնովային, որը սպանվածի խնամողն էր:
Գործին առնչվող նյութերից հայտնի է դարձել, որ Հուսեյնովանն խնամել է Նինա Մացինային և տեղյակ եղել նրա մոտ առկա կանխիկ գումարի ու արժեքավոր իրերի մասին:
Ըստ նախաքննական վարկածի՝ Հուսեյնովան խաբեությամբ Նինա Մացինայի տուն է սողոսկել, որից հետո Նարոյանին է ներս թողել, իսկ Հակոբյանը շրջակայքն է հսկել։ Նրանք կնոջը ծեծի են ենթարկել, գողացել բանկային քարտը, շրջանակի մեջ դրված ինքնագրով լուսանկարը, ինչպես նաև 130 հազար ռուբլու չափով գումար, ինչից հետո խեղդել են կնոջը:
Նելլի Մելքոնյան
