15.01.2026 | 19:15
Լիտրը 270 դրամ․ ինչու է հեղուկ գազը օր օրի թանկանում. ՏԵՍԱՆՅՈՒԹ
Դատարանը Թրամփին արգելել է Մեքսիկայի հետ սահմանին պատ կառուցել
Քաղաքականություն
04.07.2019 | 11:42
Վերաքննիչ դատարանը մերժել է հայցը, որով ԱՄՆ նախագահ Դոնալդ Թրամփի վարչակազմը խնդրում էր չեղարկել Մեքսիկայի հետ սահմանին պատի կառուցման համար Պաշտպանության նախարարությունից միջոցների ներգրավումն արգելափակելու մասին առաջին ատյանի դատարանի որոշումը: Այս մասին գրում է «Ինտերֆաքս»-ը՝ վկայակոչելով The Wall Street Journal-ը:
ԱՄՆ Սան Ֆրանցիսկոյի դատարանը որոշել է, որ «այդ միջոցների օգտագործումը խախտում է սահմանադրական պահանջն այն մասին, որ գործադիր իշխանությունը չի կարող առանց Կոնգրեսի հատկացման միջոցներ ծախսել»:
Դատավորները նաև հայտարարել են, որ «մեծ է հավանականությունը», որ սահմանային պատի համար ռազմական միջոցների օգտագործումը վիճարկող խմբերը, ինչպիսիք են Քաղաքացիական ազատությունների պաշտպանության ամերիկյան միությունը (ACLU) և Սիերրա ակումբը, հաջողության կհասնեն:
Դատարանի այս որոշումը ևս մեկ հարված էր Թրամփի համար, որն այս տարեսկզբին համապետական արտակարգ դրություն էր հայտարարել՝ երկրի հարավային սահմանին պատ կառուցելու համար Պենտագոնի միջոցներն օգտագործելուն հասնելու նպատակով: Օրենսդիրները հրաժարվել էին պատի կառուցման համար նախագահի վարչակազմի պահանջած 5.7 մլրդ դոլարը ներառել «Պետական ծախսերի մասին» օրինագծում, ինչը հանգեցրել էր կառավարության գործունեության մասնակի կասեցման: Այն ռեկորդային տևողություն ունեցավ՝ 35 օր:
Նշվում է, որ նախագահի վարչակազմը, ամենայն հավանականությամբ, կփորձի վիճարկել դատարանի որոշումը: Դատական գործընթացի ժամանակ, սակայն, սահմանային պատի կառուցումն անհնար կլինի:
