08.11.2026 | 14:48
Վթարային ջրանջատում Աբովյան քաղաքում
Գործ ունենք դատական գործի ձգձգման հետ՝ արդեն դատարանների կողմից․ Քոչարյանի պաշտպան
Հասարակություն
03.07.2019 | 11:47
Ռոբերտ Քոչարյանի գործով հունիսի 25-ին հրապարակված դատական ակտով Վերաքննիչ քրեական դատարանն արձագանքել է, որ Քոչարյանի գործի կասեցման որոշումը վերացվում է, և գործը պետք է սկսվի Առաջին ատյանի դատարանում՝ ընդհատման պահից, սակայն մինչ այս պահը Վերաքննիչ դատարանն իր այդ որոշումից հետո գործի նյութերը չի վերադարձնում Առաջին ատյանի դատարան, և, փաստորեն, մենք այս պահին գործ ունենք դատական գործի ձգձգման հետ՝ արդեն դատարանների կողմից։
Այս մասին այսօր հրավիրված մամուլի ասուլիսի ժամանակ ասաց Ռոբերտ Քոչարյանի պաշտպանական խմբի անդամ Հովհաննես Խուդոյանը։
Պաշտպանն անդրադարձավ նաև Գլխավոր դատախազության այն դիտարկմանը, որ գործի քննությունը չպետք է անհարկի ձգձգվի, ուստի հարցի վերաբերյալ հրավիրեց նաև Դատախազության ուշադրությունը։
Անդրադառնալով Ռոբերտ Քոչարյանի գործով Վերաքննիչ դատարանի կայացրած ակտին՝ Խուդոյանը նշեց, որ «Առաջին ատյանի դատարանը փաստորեն մեկօրյա ժամկետում պետք է գործի ճակատագրի վերաբերյալ որոշում կայացնի»։
«Կա՛մ կասեցնի, կա՛մ կարճի, կա՛մ այլ որոշում կայացնի և դա պետք է անի մեկօրյա ժամկետում։ Փաստորեն դատարանին հնարավորություն չի տրվում գործի նյութերին ծանոթանալու, իսկ օբյեկտիվորեն մեկ օրում դատարանն ինչպե՞ս կարող է ծանոթանալ այդ հատորներին։ Տպավորություն է, որ Առաջին ատյանի դատարանը կանգնել է պատային վիճակի առաջ»,- ասաց Խուդոյանը։
Հիշեցնենք, որ Գլխավոր դատախազությունը բողոքարկել էր Երևան քաղաքի ընդհանուր իրավասության դատարանի՝ ՀՀ երկրորդ նախագահ Ռոբերտ Քոչարյանի նկատմամբ ընտրված խափանման միջոց կալանավորման որոշումը փոփոխելու որոշումը։ Վերաքննիչ քրեական դատարանը հունիսի 25–ին որոշել էր ՀՀ երկրորդ նախագահ Ռոբերտ Քոչարյանի քրգործը վերաբացել ու նրան կրկին կալանավորել։
