Վահե Գրիգորյանը տառացի մեկնաբանել է Սահմանադրությունը․ Անդրիաս Ղուկասյան. ՏԵՍԱՆՅՈՒԹ

Դատաիրավական բարեփոխումներն այլընտրանք չունեն: Factor.am-ի հետ զրույցում հայտարարեց քաղաքական գործիչ Անդրիաս Ղուկասյանը՝ միաժամանակ նկատելով, որ այդ ուղղությամբ որևէ տեսանելի քայլ չկա:

«Դեռևս մեկ տարի առաջ այդ ուղղությամբ պետք է քայլեր իրականացվեին, մենք լսել ենք նորընտիր իշխանություններից, որ իրենք հավատարիմ են լինելու ժողովրդավարության սկզբուքներին և հանրային քննարկումները, հանրային կարծիքն իրենց համար լինելու են կարևոր: Բայց մինչ այժմ չեմ նկատել, որ դատաիրավական բարեփոխումների հետ կապված լինեն հանրային քննարկումներ»,- նշեց Ղուկսայանը։

Դատաիրավական համակարգի վերաբերյալ վարչապետ Նիկոլ Փաշինյանի՝ մայիսի 20-ի ելույթի առնչությամբ Անդրիաս Ղուկասյանն ասաց. «Կոնկրետ քրեական գործի՝ Ռոբերտ Քոչարյանի համատեքստով այդ խնդիրը մեջտեղ բերելը շատ վատ քաղաքական կոնտեքստ է արմատական նշանակություն ունեցող այդ հարցերի համար»:

Նա նաև ընդգծեց, թե ստացվեց այնպես, որ հանրության համար բոլոր կարևոր հարցերն ի հայտ եկան կոնկրետ քրեական գործի հետ կապված ինչ-որ դատական որոշումից հետո:

Այն, որ իշխանությունը մինչ այժմ հանրությանը չի ներկայացրել դատաիրավական համակարգի բարեփոխման հստակ մեխանիզմներ, ըստ Ղուկասյանի, ունի թե՛ օբյեկտիվ, թե՛ սուբյեկտիվ պատճառներ. «Օբյեկտիվ պատճառն այն է, որ «Քաղաքացիական պայմանագիրն» այդ ներուժը չունի, չի ունեցել դեռևս ընդդիմադիր եղած ժամանակ, որով այսօր կկարողանար լուծել առկա խնդիրները: Սուբյեկտիվ մասն էլ այն է, որ «Իմ քայլը» դաշինքում չկա կոնսենսուս, միասնական պատկերացում ձևավորված չէ»։

Ինչ վերաբերում է Սահմանադրական դատարանի շուրջ ստեղծված իրավիճակին, Անդրիաս Ղուկասյանը կարծիք հայտնեց, որ հեղափոխությունից հետո ՍԴ կազմը պետք է հրաժարական տար. «Վահե Գրիգորյանի մեկնաբանությունը Սահմանադրության տառացիորեն կատարած մեկնաբանությունն է»։

Մանրամասները՝ տեսանյութում։

Շողիկ Գալստյան