Հասարակություն
28.06.2019 | 15:22
Մարտի 1-ի գործով Մանվել Գրիգորյանը բացատրություն կամ ցուցմունք չի տվել։ Այս մասին այսօր հրավիրված ասուլիսի ժամանակ հայտարարեց Մանվել Գրիգորյանի պաշտպաններից Լևոն Բաղդասարյանը։
Նա անդրադառնալով փաստաբան Սեդա Սաֆարյանի այն հայտարարությանը, թե գործի նյութերում կա փաստաթուղթ համաձայն որի՝ Ռոբերտ Քոչարյանի հրավիրած խորհրդակցությանը Մանվել Գրիգորյանը չի մասնակցել, ինչի կապակցությամբ Քոչարյանը հայտարարել է, որ Մանվել Գրիգորյանի «մայրիկը լացացնելու է» ասաց․ «Եթե դա իրոք այդպես է, ապա նշեմ, որ մայրիկ լացացնելը իրավական կատեգորիա չէ և երկրորդը՝ երբ դա արվում է երկրի առաջին դեմքի անունից, ապա պետք է դրան տրվի այլ գնահատական։ Մանվել Գրիգորյանը չի մասնակցել այդ խորհրդակցությանը լավ հասկանալով, որ անօրինական գործողություններից պետք է զերծ մնա։ Ինչ վերաբերում է այդ արտահայտությանը, ապա ասեմ, որ թուրքը անգամ Մանվել Գրիգորյանի մայրիկը չի կարողացել լացացնել և՛ առաջին նախագահի օրոք, և՛ երկրորդ, և՛ երրորդ»։
Մանվել Գրիգորյանի պաշտպանը անդրադարձավ նաև Էջմիածնի քաղաքապետ Դիանա Գասպարյանի կողմից Մանվել Գրիգորյանին պատկանող սրճարանի աշխատանքը բոյկոտելու վերաբերյալ հայտարարությանը՝ ասելով, որ դա պատվի և արժանապատվության հետ կապված խնդիր է պարունակում: «Իշխանության ներկայացուցչի հայտարարությունը ատելության տիպիկ քարոզ էր՝ դրանից բխող բոլոր իրավական հետևանքներով։ Այդ հայտարարություններում տեսել ենք պատվի և արժանապատվության հետ կապված խնդիր, որից հետո դիմելու ենք, որ իրավապահ մարմինները տան իրենց գնահատականը»,- ասաց նա։
Խոսելով Մանվել Գրիգորյանի առողջական վիճակից՝ Բաղդասարյանը պնդեց՝ վիճակը վատ է, նրա նկատմամբ հաշվեհարդար է իրականացվում:
«Իմ պաշտպանյալի մոտ առկա է սթրեսային խանգարում, անկայունություն։ Նա ունի 33-ից ավելի ծանր հիվանդություն։ Նրան պետք է հնարավորինս զերծ պահենք այդ հիվանդությունների մասին խոսակցություններից։ Անձն ունի նաև այլ հիվանդություն, որն ուսումնասիրել է հոգեթերեպևտը և տվել է իր ախտորոշումը՝ փաստելով, որ կալանքի պայմաններում հնարավոր չէ բուժական կուրս անցկացնել», – եզրափակեց պաշտպանը։
Լիլիթ Շաբոյան
