Պարտադիր չի՝ Հայաստանում քաղաքացիական պատերազմ լիներ, որ անցումային արդարադատության կարիք լիներ․ Դանիել Իոաննիսյան․ ՏԵՍԱՆՅՈՒԹ

Անցումային արդարադատությունը տեղին է այն պայմաններում, երբ փոխվում են խաղի կանոնները։ «Ի՞նչ կառուցվածք պետք է ունենան անցումային արդարադատության մարմինները Հայաստանում և որո՞նք են դրանց գործունեության ժամկետային սահմանները» թեմայով քննարկմանն ասաց «Իրազեկ քաղաքացիների միավորում» ՀԿ ծրագրերի համակարգող Դանիել Իոաննիսյանը:

«Ճանապարհային ոստիկանության գրեթե բոլոր տեսուչները երբևէ կաշառք են վերցրել, հիմա նրանց բոլորին ասես վերջ՝ կարգը փոխվել է, տասը տարի առաջ կաշառք եք վերցրել, հիմա ձեզ դատում ենք, կամ «Մարտի 1»-ին Երևան են բերվել հազարավոր զինվորներ կամ ոստիկաններ, հիմա այդքան մարդ պե՞տք է նստեցնել։ Ուրեմն եկեք այս մասով ներենք, բայց ովքեր դրանից տուժել են, նրանց փոխհատուցենք։ Ես համաձայն եմ, որ անցումային արդարադատության թիվ 1 հիմքը «Մարտի 1»-ի դեպքերն են։ Անտեղի նստած մարդկանց պետք է փոխհատուցում տալ և հաշտեցնել պետությանն ու քաղաքացուն։ Պարտադիր չի՝ Հայաստանում քաղաքացիական պատերազմ լիներ, որ անցումային արդարադատության կարիք լիներ»,- հավելեց նա:

Ըստ Իոաննիսյանի՝ անցումային արդարադատության կիրառման ժամկետները տարբեր բաղադրիչների մասով կարող են տարբեր լինել:

«Եթե մենք խոսում ենք վեթինգի մասին, պարտադիր չի՝ դրա բաղադրիչներն ունենան հստակ ժամկետ, օրինակ՝ ի՞նչ էական է՝ երբ է դատավորը իր ունեցվածքը ձեռք բերել։ Այդ մարդուն պետք է ասել ցտեսություն՝ անկախ նրանից, թե երբ է անօրինական ունեցվածք կուտակել»,- ասաց Իոաննիսյանը։

Մանրամասները՝ տեսանյութում:

Ռոբերտ Անանյան