Գուցե դիվային ուժե՞ր կան, որոնք խոչընդոտում են լրագրողների դեմ բռնությունների բացահայտմանը․ Թագուհի Թովմասյանը քննարկում կնախաձեռնի. ՏԵՍԱՆՅՈՒԹ

«Ինձ համար անակնկալ է այն, որ հետհեղափոխական Հայաստանում մենք քրեական գործերի ելքով ունենք այն վիճակը, որ ունեցել ենք նախկինում։ Ինձ համար սա անհասկանալի է, և ես առաջիկայում ԱԺ-ում կնախաձեռնեմ քննարկում, որպեսզի հասկանանք՝ ինչ է տեղի ունենում գործերի քննության մասով։ Ցանկացած մեկը, որ լրագրողի վրա ձեռք է բարձրացրել, պետք է խստագույնս պատժվի։ Ուղղակի վստահ եմ՝ քաղաքական իշխանությունը կոնկրետ հրաման չի տվել լրագրողների գործերը փակելու, դրա համար կարծում եմ՝ խնդիր ունենք ներքին տիրույթում, և պետք է ստիպենք զբաղվել լրագրողների գործերով»,- Մեդիա կենտրոնում «Էլեկտրիկ Երևան. 4 տարի անց» թեմայով քննարկմանն ասաց ԱԺ «Իմ քայլը» խմբակցության պատգամավոր Թագուհի Թովմասյանը՝ անդրադառնալով 2015 թվականի հունիսի 23-ին Բաղրամյան պողոտայում մեղավորներին մինչ օրս պատժված չլինելու հանգամանքին։

Իշխանական խմբակցության պատգամավորը համոզված է՝ եթե «Էլեկտրիկ Երևանի» դեպքերի պատասխանատուները պատժված լինեին, 2016 թվականի հուլիսի 29-ին Սարի թաղում լրագրողների նկատմամբ բռնություն չէր կիրառվի։

Թագուհի Թովմասյանը անհրաժեշտ է համարում լրագրողների դեմ բռնությունների հեղինակներին պատժելը: «Մարդու իրավունքների հանձնաժողովում քննարկումներ կնախաձեռնվեն ու հարցեր կուղղվեն պատասխանատու մարմիններին․ Գուցե դիվային ուժե՞ր կան, որոնք խոչընդոտում են լրագրողների դեմ բռնությունների բացահայտմանը»,- ասաց պատգամավորը։

Մանրամսները՝ տեսանյութում:

Ռոբերտ Անանյան