Զոհերի առկայության մասին տեղյակ մարդիկ են եղել, որ հեռախոսով ասում էին՝ լավ ա եղել. Յուրի Խաչատուրովի պաշտպան

«Ի սկզբանե նշանակված են մեղադրյալներ և բոլոր գործողությունները բերում են նրան, որ սույն գործով մեղադրյալները պատասխանատվության ենթարկվեն»,- Ռոբերտ Քոչարյանի և մյուսների գործով դատական նիտին հայտարարեց «Մարտի 1»-ի գործով մեղադրյալ Յուրի Խաչատուրովի պաշտպան Միհրան Պողոսյանը:

Նրա խոսքով՝ միայն այն հանգամանքը, որ Յուրի Խաչատուրովը եղել է Երևանի կայազորի պետը, վարույթն իրականացնող մարմնի համար հիմք է հանդիսացել վերջինիս մեղադրանք առաջադրել:

«Եթե պայմանականորեն ընդունենք, որ 2008 թվականի մարտի 1-ին եղել են 5.000 կամ 10.000 զինվորականներ Երևանում, ապա հարց է առաջանում՝ ինչո՞վ է պայմանավորված ՀՔԾ-ի բարյացակամ վերաբերմունքը, և ինչո՞ւ նրանք այս գործով դատավարական կարգավիճակ չունեն: Նրանք ևս կատարել են որոշ գործողություններ: Ըստ մեղադրանքի տրամաբանության՝ զինվորականների ներգրավումը եղել է անօրինական, բա նրանք ինչո՞ւ չեն ներգրավվում, ինչո՞ւ պատասխանատվության չեն ենթարկվում: Ու այս տրամաբանությամբ այս գործի քննությունը շարունակվում է»,- ասաց փաստաբանը:

Նրա խոսքով՝ գործի տարիների քննության ընթացքում մարդիկ են եղել, որ տեղյակ են եղել զոհերի առկայության մասին, հեռախոսային խոսակցության ժամանակ միմյանց հետ նշում էին՝ «լավ ա եղել՝ ինչ եղել ա». «Ու էս պարագայում էդ ամեն ինչին գնահատական չի տրվում, ու նշանակովի մեղադրյալների պարագայում փորձում են դատաքննություն իրականացնել»:

Փաստաբանը հիշեց 2018 թվականի փետրվարին դատախազ Կարեն Բիշարյանի հայտարարությունն ԱԺ ամբիոնից, թե նախկին նախագահներին այս գործում ներգրավվելու անհրաժեշտություն չի եղել, գործով ամեն ինչ իրականացվել է, սակայն հայտնի իրադարձությունների հետևանքով նրա և դատախազության դիրքորոշումը փոխվեց: Միհրան Պողոսյանը շարունակում է պնդել, որ Յուրի Խաչատուրովի նկատմամբ քրեական հետապնդումը պետք է դադարեցվի: Նա տեղեկացրեց, որ ինքը ևս անհատական դիմում է ներկայացրել Սահմանադրական դատարան՝ ՀՀ Քրեական օրենսգրքի 300 և 300.1 հոդվածների Սահմանադրականության հարցը քննելու համար: Հիշեցնենք, որ Յուրի Խաչատուրովը մեղադրվում է սահմանադարական կարգը տապալելու համար:

Տեսանյութը՝ քիչ անց: