Ամեն մեկն իր արարքի համար է պատասխան տալու, այս դատավարությունը դրա վառ արտացոլումն է. գլխավոր դատախազը՝ Քոչարյանի հայտարարության մասին. ՏԵՍԱՆՅՈՒԹ

ՀՀ գլխավոր դատախազ Արթուր Դավթյանը ևս այսօր դատարանում ելույթով հանդես եկավ։ Ասաց, որ առաջին ատյանի դատարանը փորձ է արել արդարադատությունից խուսափել. «Առաջին ատյանի դատարանին փաստարկված և մանրամասն ներկայացվել է Սահմանադրական կարգը տապալելու մեղադրանքի նկարագրությունը, հանցավոր սխեմա՝ առանձին փուլերով և դրանք ապացուցող դրվագներով»։

Դատախազը հարց բարձրացրեց կաշառքի մասով, ասաց՝ դատարանը հաշվի չի առել, որ, օրինակ, մեղադրյալի որդու բանկային հաշվին մեծ թվով գումարներ է փոխանցվել՝ առանց որևէ հիմնավորման: «Ինչպե՞ս կարող էր արդարադատությանը հակված դատավորի մոտ հարց չառաջանալ, թե ինչպես կարող էր մեղադրյալը, որին արգելվում էր ձեռնարկատիրական գործունեություն կատարել, 2007 թվականից երկու տարում նրա 26-ամյա որդու հաշվին փոխանցվել 18 միլիոն դոլար»,- ասաց գլխավոր դատախազը։

Արթուր Դավթյանը պնդեց, որ փորձ է արվում բանակի ներգրավումը Մարտի 1-ի դեպքերի ժամանակ ակտիվորեն քողարկել. «Զինվորական ավտոմեքենաների համարանիշերի, զինվորական համազգեստի տարբերանշանների փոխումը, քաղաքացիական անձանց հանդերձավորումը, դեպքից անմիջապես հետո ապացույցների փոփոխելուն ուղղված բազում ապացույցներ կան»:

Գլխավոր դատախազը դատարանին կոչ արեց չտրվել սպառնալիքներին և կայացնել արդարացի որոշում: «Ձեզ հնչում են սպառնալիքներ, որոնց ես չեմ կարող չանդրադառնալ։ Անմեղ ձևակերպումներով, որ ամեն մեկն իր արարքի համար ենթարկվելու է պատասխանատվության, մեր ենթադրությամբ՝ այլ նպատակներ են հետապնդում: Ակնհայտ է, դա բացարձակ ճշմարտություն է, որ յուրաքանչյուրն իր արարքի համար է պատասխան տալու: Հենց այս դատավարությունը դրա վառ արտացոլումն է։ Շատ խորհրդանշական է, որ այդ արտահայտությունը կատարվում է հենց մեղադրյալի կողմից»,- ասաց դատախազը։

Արթուր Դավթյանը դատարանին միջնորդեց բեկանել առաջին ատյանի կայացրած որոշումները, որոնք իրենք որակում են ապօրինի և անօրինական. «Ստեղծված իրավիճակում միակ համաչափ խափանման միջոցը կալանավորումն է»:

Մանրամասները՝ տեսանյութում:

Լիլիթ Շաբոյան