Փաստական տվյալների տարբերություն կա այս քրեական գործի և նախկինի միջև. Երևանի դատախազ. ՏԵՍԱՆՅՈՒԹ

Փաստաբան Սեդա Սաֆարյանը այսօր Քոչարյանի և մյուսների գործով դատավոր Արմեն Դանիելյանին ինքնաբացարկի միջնորդություն ներկայացրեց: Դատախազությունը միջնորդության դեմ առարկեց մասնակի՝ միայն Ռոբերտ Քոչարյանի իշխանավարման տարիներին նշանակման մասով:

Դատախազ Պետրոս Պետրոսյանն ասաց՝ այն հանգամանքը, որ դատավորը նշանակվել է կողմերից մեկի իշխանության տարիներին, չի նշանակում, որ այդ անձը, որպես դատավոր, պետք է կաշկանդված լինի գործն անկողմնակալ քննելու հարցում:

Երևանի դատախազ Գևորգ Բաղդասարյանն ասաց. «Արձանագրենք, որ դատարանի կազմավորման ընթացակարգում դատավորի նշանակման հանգամանքներն էական նշանակություն ունեն դատավորի անկախության համար: Մենք գտնում ենք, որ դատարանի նշանակման պայմանները կարող են անկողմնակալության վրա ազդեցություն ունենալ»,- ասաց նա:

Դատախազը, սակայն, ասաց, որ դատավորն ինքը պետք է գնահատի՝ կաշկանդվա՞ծ է որևէ հարցով, թե՞ ոչ. «Դատավորը ինքը պետք որոշի՝ անկողմնակա՞լ է, թե՞ կողմնակալ: Նկատի ունենալով, որ սույն քրեական գործի հանգամանքերը և նախկինում Ձեր քննած գործի հանգամանքները վերաբերվում են նույն քրեական գործին, բայց ունեն փաստական տվյալների տարբերություն, և եթե այդ տարբերությունը կարող է ազդեցություն ունենալ գործի անաչառության վրա, այո՛, միանում ենք: Բայց եթե դատարանը գտնի, որ փաստական տվյալների տարբերությունը բավարար է, որպեսզի ինքն անկաշկանդ, անկողմնակալ որոշում կայացնի, ապա կարծում եմ՝ դա բավարար երաշխիք է նրա անկողմնակալության համար»:

Մանրամասները՝ տեսանյութում:

Լիլիթ Շաբոյան