Վանաձորում ավելացել են տրանսպորտում գողության դեպքերը

Վանաձորցիները վերջին շրջանում հաճախ են բարձրաձայնում, որ գրպանահատության ականատես կամ զոհ են դարձել: Գողության դեպքերը շատ են հատկապես տրանսպորտում: Գրեթե բոլոր դեպքերում տուժողներից գողանում են դրամապանակ կամ բջջային հեռախոս: Գրպանահատության զոհերից ոմանք դեպքի հետ կապված դիմել են համապատասխան մարմիններին, շատերը, սակայն, ընթացք չեն տվել:

Լոռու մարզի դատախազ Լուսինե Սեփխանյանը Factor.am-ի հետ զրույցում ներկայացնելով վերջին 2 ամսվա ընթացքում գրանցված գրպահանատության դեպքերը՝ նշեց, որ ի տարբերություն 2018 թվականի՝ այս տարի արձանագրված դեպքերն ավելի շատ են:

«2018 թվականի ապրիլ-մայիսին ունեցել ենք գրպանահատության ընդամենը 1 դեպք: Դա եղել է ցույցերի ժամանակ, և քաղաքացու գրպանից գողացել են «Սամսունգ» ֆիրմայի բջջային հեռախոս: Իսկ այս տարի ունեցել ենք 6 դեպք: 2 դեպքում տրանսպորտում բաճկոնի և տաբատի գրպանից գողացել են գումար, մյուս 4 դեպքում՝ դրամապանակ, որոնցում եղել են գումար, անձը հաստատող փաստաթղթեր, բանկային քարտեր»,- ներկայացրեց Լուսինե Սեփխանյանը:

Խնդիրն այն է, որ գրպանահատության զոհ դարձած քաղաքացիները հիմնականում, բանկային քարտերի հետ միասին, պահել են նաև գաղտնաբառերը, արդյունքում գողություն կատարող անձը կանխիկացրել է քարտերում առկա գումարը:

Մեր հարցին՝ ի՞նչը կարող է գողության դեպքերի ավելացման պատճառ դառնալ, դատախազը պատասխանեց. «Սովորաբար գողությունների ավելացման պատճառը միշտ լինում է անձանց սոցիալական վատ վիճակը: Բայց թե կոնկրետ ինչի տրանսպորտում, այդ մասին չեմ կարող ստույգ պատճառներ նշել: Բայց գողությունների թվի աճ ունենք»:

Նշված 6 դեպքից 2 գործերը կարճվել են՝ դիմողների բողոքի բացակայության հիմքով, 4 դեպքով քրեական գործ է հարուցվել:

Տաթևիկ Ղազարյան