14.12.2025 | 19:26
Մրգի խանութի սեփականատերը զինաթափել է Սիդնեյի լողափին մարդկանց վրա կրակողներից մեկին
Հայաստանում արձանագրված հրդեհների գերակշիռ մասի պատճառը մարդկային գործոնն է․ Հովհաննես Խանգելդյան
Հասարակություն
12.06.2019 | 17:36
Հայաստանում արձանագրված հրդեհների գերակշիռ մասի պատճառը մարդկային գործոնն է: Այս մասին այսօր հրավիրված մամուլի ասուլիսի ժամանակ, ամփոփելով ամռան ամիսներին արձանագրված հրդեհները, ասաց ՀՀ ԱԻՆ ճգնաժամային կառավարման ազգային կենտրոնի պետ, փ/ծ գնդապետ Հովհաննես Խանգելդյանը։
«Եթե հիմք վերցնենք, որ հրդեհների զգալի մասը ծագել է բուսածածկ տարածքներում, գերակշիռ մեծամասնությունը՝ չոր խոտածածկույթներում, հասկանալի է, որ պատճառը մարդու անփույթ վարմունքն է կրակի հետ, բաց տարածքներում կրակն օգտագործելուց հետո չհանգցնելը, մեքենաներից ծխախոտ նետելը։ Մեծ տոկոս են կազմում ավտոճանապարհների հարակից տարածքներում բռնկված հրդեհները»,- ասաց նա՝ կոչ անելով քաղաքացիներին շատ զգոն լինել հատկապես բնության գրկում և չնպաստել անթույլատրելի գործողություններով հրդեհային վիճակի վատթարացմանը։
ՀՀ ԱԻՆ ճգնաժամային կառավարման ազգային կենտրոնի պետը նաև նշեց, որ մեր քաղաքացիներն ահազանգում են «911» ծառայություն ոչ միայն դեպքերի, պատահարների դեպքում, այլ նաև կենցաղային ամենատարբեր հարցերի հետ կապված։
«Մեր ծառայությունը հունվարի 1-ից մինչև հունիսի 11-ը ընկած ժամանակահատվածում 8783 դեպք է արձանագրել, որից՝ 3852 արտակարգ բնույթի, իսկ 2869-ը՝ կենցաղային բնույթի»,- ասաց Խանգելդյանը։
Վերջնիս նաև անդրադարձավ վերջին շրջանում հաճախակի արձանագրվող օձերի հայտնաբերման դեպքերին և նշեց, որ Հայաստանում այս տարվա առաջին 5 ամիսներին գրանցվել է օձի խայթոցի 32 դեպք, արձանագրվել է մեկ մարդու մահ։
«Առավել վտանգավոր է ապրիլից հունիս ժամանակահատվածը, այսինքն՝ օձերի զուգավորման և բազմացման ժամանակը: Այս ամիսներին նրանք չափազանց ագրեսիվ են, իսկ թույնը մեծ խտություն ունի: Օձեր հանդիպելու հավանականությունը մեծանում է լեռնային տեղանք այցելելիս, գյուղատնտեսական ցանքատարածքներում և հանդերում: Իսկ, եթե օձը տուն է մտել, ապա կտրականապես արգելվում է նրա նահանջի ճանապարհները փակել և նրան անկյուն քշել: Անհրաժեշտ է երեխաներին հնարավորինս հեռու տանել այդ տարածքից և 911 հեռախոսահամարով անմիջապես փրկարարների կանչել»,-ասաց նա:
