13.08.2026 | 01:00
ՊՍԺ-ն` Եվրոպայի Սուպերգավաթի հաղթող. ՏԵՍԱՆՅՈՒԹ
Նախաքննական մարմինը բացառում է, որ Սարգիս Ավագյանի սպանությունը կապ ունի Մարտի 1-ի հետ․ ՔԿ-ն՝ Սեդա Սաֆարյանի հայտարարության մասին
Հասարակություն
12.06.2019 | 15:57
Այսօր փաստաբան Սեդա Սաֆարյանը Ռոբերտ Քոչարյանի գործով դատական նիստի ժամանակ և դրանից հետո լրագրողների հետ զրույցում հայտնեց, որ Մարտի 1-ի գործով հրազենային ծանր վնասվածք ստացած Արթուր Ավագյանի հորը երեկ սպանել են և Ավագյանն այսօր չի կարողացել ներկայանալ դատարան։
Սաֆարյանը չբացառեց, որ այդ սպանությունը կարող է կապ ունենալ Մարտի 1-ի հետ։
Factor.am-ը Քննչական կոմիտեից հետաքրքրվեց՝ արդյոք երեկ տեղի ունեցած սպանության հանգամանքները կապված են Մարտի 1-ի գործի հետ։
«Այս պահին ձեռք բերված փաստական հանգամանքներով՝ նախաքննական մարմինը բացառում է, որ Սարգիս Ավագյանի սպանությունը կապ ունի Մարտի 1-ի դեպքի հետ։ Քննչական կոմիտեն իրականցրել է մի շարք քննչական գործողություններ, որոնցով ձեռք բերված բավարար ապացույցներով բացառվում է նաև, որ Ավագյանի սպանության պատճառը նրան Մարտի 1-ի գործով դատարան ներկայանալուց զրկելը լինի»,-մեզ հետ զրույցում ասաց Քննչական կոմիտեի լրատվության բաժնի պետ Նաիրա Հարությունյանը՝ նշելով, որ քրեական գործի վերաբերյալ պարբերաբար կտրվի տեղեկատվություն:
Հիշեցնենք, որ հունիսի 10-ին Երևան քաղաքի Էրեբունի վարչական շրջանի տարածքում ծեծելով, ապա նաև դիտավորությամբ դանակի հարվածով տաքսու վարորդի են սպանել:
Աղավնի Սուքիասյան
