10.12.2025 | 23:29
ԱՄՆ Կոնգրես է ներկայացվել 907 ուղղումն ամբողջությամբ չեղյալ համարելու մասին օրինագիծ
Երգի պետական թատրոնում նախկին տնօրենի՝ 42 մլն դրամի խախտումներից տեղյակ չեն, ինքն էլ երկրում չէ. նոր տնօրենի պարզաբանումը
Հասարակություն
06.06.2019 | 14:07
ՀՀ ոստիկանության պաշտոնական կայքէջը հաղորդում է տարածել Երգի պետական թատրոն ՊՈԱԿ-ի նախկին տնօրենի խախտումների վերաբերյալ, ըստ որի՝ նախկին տնօրեն Արթուր Ասատրյանը 1998-2019 թվականներին, իր պաշտոնեական դիրքն օգտագործելով, առանձնապես խոշոր չափերի հափշտակություն կատարելու միասնական դիտավորությամբ, ՊՈԱԿ-ին պատկանող Երևանի Խանջյան փողոցի շենքի տարբեր աշխատասենյակներ առանց պայմանագրերի և, որոշ դեպքերում՝ նաև պայմանագրերով, ապօրինի վարձակալության է հանձնել ֆիզիկական և իրավաբանական անձանց: Վարձակալությունից կանխիկ եղանակով ստացված գումարները չեն մուտքագրվել ՊՈԱԿ-ի բյուջե և յուրացվել են:
Արթուր Ասատրյանի յուրացրած գումարի չափը, ըստ Ոստիկանության տվյալների, շուրջ 41 մլն 780 հազար ՀՀ դրամ է:
Ոստիկանության հաղորդագրության համաձայն՝ հարուցվել է քրեական գործ, որն ուղարկվել է քննչական մարմին՝ նախաքննության:
Այս հարցով Factor.am-ը փորձեց կապ հաստատել Երգի պետական թատրոն ՊՈԱԿ-ի նախկին տնօրեն Արթուր Ասատրյանի հետ: Մեր բազմաթիվ զանգերն անպատասխան մնացին:
Թատրոնի ներկայիս տնօրեն, Երևանի ավագանու «Իմ քայլը» դաշինքի անդամ Արմեն Սարգսյանը, Factor.am-ի հետ հեռախոսազրույցում նշեց, որ նախկին տնօրենի ապօրինությունների մասին տեղյակ չէ: «Ես նույնպես Ոստիկանության տարածած հաղորդագրությունից եմ այդ մասին իմացել»,- ասաց Սարգսյանը՝ նշելով, որ իր տեղեկությամբ նա այս պահին երկրում չէ:
«Առողջական խնդիրներ ուներ, բուժման էր մեկնել, գուցե դեռ չի վերադարձել»,- նշեց Արմեն Սարգսյանը:
Թեմայի շուրջ պարզաբանում ստանալու նպատակով Factor.am-ը փորձեց կապվել նաև Երգի պետական թատրոն ՊՈԱԿ-ի գեղարվեստական ղեկավար Արթուր Գրիգորյանի հետ, սակայն նա նույնպես զանգերին չէր պատասխանում:
Նելլի Մելքոնյան
