08.06.2026 | 20:12
Էրդողանն ընդունել է Պոլսի Հայոց պատրիարքին
Քոչարյանի պաշտպանի բողոքը քննող Վազգեն Ռշտունին ինքնաբացարկ հայտնեց
Հասարակություն
03.06.2019 | 19:22
Վերաքննիչ քրեական դատարանի նախագահ Վազգեն Ռշտունին խորհրդակցական սենյակից վերադառնալով հրապարակեց որոշումը, որով բավարարեց քննիչի միջնորդությունը: Դատավորը ինքնաբացարկ հայտնեց:
Նա, հիշեցնենք, քննում էր Հայաստանի երկրորդ նախագահ Ռոբերտ Քոչարյանի նկատմամբ քրեական հետապնդումը անձեռնմխելիության հիմքով չդադարեցնելու որոշման դեմ նրա պաշտպան Հովհաննես Խուդոյանի բողոքը:
Քննիչ Մուշեղյանը նախագահող դատավորին ինքնաբացարկի միջնորդություն էր ներկայացրել՝ վկայակոչելով այն հանգամանքը, որ Ռշտունին նախկինում հայտարարել էր, որ համամիտ է Քոչարյանին անձեռնմխելիության հիմքով առաջին անգամ ազատ արձակած դատավորի` Ալեքսանդր Ազարյանի հետ: Դատախազությունը ևս միացավ քննիչի միջնորդությանը, ասելով, որ դատարանը գործով ունի կանխակալ մոտեցում:
Նշենք, որ Քոչարյանին անձեռնմխելիության հիմքով ազատելուց հետո Հովհաննես Խուդոյանը վարույթն իրականացնող մարմնին՝ Հատուկ քննչական ծառայությանը, միջնորդել է նրա նկատմամբ դադարեցնել քրեական հետապնդումը, սակայն միջնորդությունը մերժվել է: Մերժման որոշումը բողոքարկվել է Առաջին ատյանի դատարան, և դատավոր Գագիկ Պողոսյանը մերժել է Խուդոյանի բողոքը: Դատական ակտը պաշտպանի կողմից բողոքարկել է Վերաքննիչ դատարան ու մակագրվել Վազգեն Ռշտունուն:
Հիշեցնենք, որ Քոչարյանը մեղադրվում է 2008 թվականի մարտին Հայաստանի սահմանադրական կարգը տապալելու և առանձնապես խոշոր չափի կաշառք ստանալու համար:
Լիլիթ Շաբոյան
