Մենք այսօր գտնվում ենք սահմանադրականության խոր ճգնաժամի մեջ․ Վարդան Այվազյան

«Մենք այսօր գտնվում ենք սահմանադրականության խոր ճգնաժամի մեջ, ոչ թե Սահմանադրության, այլ սահմանադրականության ճգնաժամի։ Սա նշանակում է, որ մեր գործող Սահմանադրությունը, ըստ էության, չի համապատասխանում իրական Սահմանադրության չափանիշներին, որն էլ իր հերթին բխեցնում է մնացած ավելի ցածր մակարդակի հակամարտություններ։ Այս ճգնաժամի հետևանքով մենք ունենք քաղցկեղածին ուռուցք և մեր առջև խնդիր ենք դրել բուժելու այն՝ ի դեմս դատական համակարգի»,- այս մասին այսօր լրագրողների հետ զրույցում ասաց սահմանադրագետ Վարդան Այվազյանը։

Սահմանադրագետը հարց է բարձրացնում, թե դատավորներին վեթինգի ենթարկողների գործողությունների իրավաչափությունը ո՞վ է ստուգելու․ «Մենք ունենում ենք փակ շրջափուլ, որտեղ գործելու է հավի ու ձվի պատմությունը»։

Վարդան Այվազյանի կարծիքով՝ դատական համակարգի առողջացմանն ուղղված քայլերը «հեքիմային» են, որը հղի է տարբեր վտանգներով․ «Առաջին հերթին դրանից տուժելու է մեր երկրի արտաքին վարկանիշը, որի արդյունքում մենք կարող ենք տեսնել շատ ու շատ պաշտոնյաների նկատմամբ հարուցված քրեական գործերից հետո այլ պետություններ նրանց տալիս են որակումներ, որ նրանք քաղաքական բանտարկյալներ են, տալիս են քաղաքական ապաստաններ, ներկայացնում են նրանց որպես քաղհալածյալներ, սա անգրագետ մոտեցման արդյունք է»։

Այվազյանը դատական համակարգը առողջացնելու իր մեթոդն է առաջարկում․ «Որևէ գործողություն չպետք է դուրս լինի սահմանադրական և իրավական կարգավորման շրջանակներից։ Այս տեսանկյունից և՛ անցքումային արդարադատությունը, և՛ վեթինգը մեր գործող իրավակարգավորումների շրջանակներում չեն կարող կենսունակ լինել»։

Նա առաջարկում է դատավորներին վերանշանակման հնարավորություն տալ, ինչը կհանգեցնի համակարգի ինքնամաքրման։

Լիլիթ Շաբոյան