08.06.2026 | 19:42
Ողջունում ենք, որ Հայաստանում խորհրդարանական ընտրություններն ավարտվեցին խաղաղ և հանգիստ մթնոլորտում․ Թուրքիայի ԱԳՆ
Ուժ և համբերություն բուժում ստացող երեխաներին. քաղցկեղը հաղթահարած Հայկի մաղթանքը. ՏԵՍԱՆՅՈՒԹ
Հասարակություն
31.05.2019 | 16:17
Ուժ և համբերություն. սա քաղցկեղը հաղթահարած 19-ամյա Հայկ Ղազարյանի մաղթանքն է պրոֆեսոր Յոլյանի անվան Արյունաբանական կենտրոնում բուժում ստացող երեխաներին:
Հունիսի 1-ին՝ Երեխաների պաշտպանության միջազգային տոնին ընդառաջ Արյունաբանական կենտրոնում «Ժպիտների քաղաք» բարեգործական հիմնադրամի, Հայաստանի գեղարվեստի պետական ակադեմիայի, «Առողջության կամուրջ» բարեգործական հիմնադրամի և Արյունաբանական կենտրոնի նախաձեռնությամբ տոնական միջոցառում է կազմակերպվել՝ քաղցկեղը հաղթահարած երեխաների մասնակցությամբ։
Կենտրոնի մանկական արյունաբանական բաժանմունքի վարիչ Լալա Վաղարշակյանը նշեց, որ նախատեսել են զվարճալի ծրագիր՝ օճառի պղպջակներ, աճպարար, տիկնիկային թատրոն և ճաշկերույթ, իսկ տոնական օրը կամփոփվի հագուստների ցուցադրությամբ և ձեռագործ իրերի ցուցահանդես-վաճառքով:
«Հագուստների ցուցադրության ընթացքում հանդես կգան նաև քաղցկեղից բուժված երեխաները, որոնք կկրեն այժմ բուժում ստացող երեխաների նկարած նկարների հիման վրա ստեղծված շապիկներ, իսկ ցուցահանդես- վաճառքին Հայաստանի գեղարվեստի պետական ակադեմիայի ուսանողները և դասախոսները կներկայանան իրենց ստեղծագործություններով՝ քանդակներ, կտավներ»,- ընդգծեց Լալա Վաղարշակյանը։
Բժշկի տեղեկացմամբ՝ այս պահին կենտրոնում 16 երեխա է բուժում ստանում: Ընդհանուր առմամբ, տարեսկզբից քաղցկեղով հիվանդ 35 երեխա է դիմել կենտրոն:
Նելլի Մելքոնյան
