Հասարակություն
29.05.2019 | 11:38«Մինչ օրս «Քաղաքացու որոշում» կուսակցությունը չի ստացել ԱԺ ԲՀԿ խմբակցության ղեկավար Գագիկ Ծառուկյանի վերաբերյալ ԱԺ նախագահ Արարատ Միրզոյանին ուղղված, ինչպես նաև կուսակցություններին ուղղված Էթիկայի հանձնաժողով ստեղծելու մասին դիմումների պատասխանները։ Միայն «Իմ քայլը» խմբակցության ղեկավարն է պատասխանել մեզ։ ՀՔԾ-ն մերժել է քրեական գործ հարուցել՝ հանցադեպի բացակայության պատճառով։ Կարելի է արձանագրել, որ այս երկրում քիչ ինստիտուտներ կան, որ օրենքով վերապահված ժամկետներում են պատասխանում»,- այսօր հրավիրված ասուլիսում հայտարարեց «Քաղաքացու որոշում» կուսակցության գործադիր մարմնի քարտուղար Սուրեն Սահակյանը։
Նա շեշտեց, որ գործընթացում լրացուցիչ ուղղորդում կամ պատվիրատու փնտրելն անհեթեթ է․ «Մեր նպատակը բիզնեսի ու պետական կառավարման համակարգի տարանջատումն է։ Կարևոր ենք համարում ընդգծել, որ մեր կողմից ձեռնարկված գործընթացը ուղղված չէ պարոն Ծառուկյանի դեմ։ Ավելին, խնդրի լուծման շահառուն հենց նա է։ Եթե կառավարման համակարգը և բիզնեսը տարանջատված լինեն, պարոն Ծառուկյանի գործունեությունը պաշտպանված կլինի հանրության կողմից»։
Սուրեն Սահակյանը ներկայացրեց նաև ՀՔԾ-ի որոշումից մի դրվագ, որով մերժվել էր Ծառուկյանի նկատմամբ քրեական հետապնդում իրականացնել․ «Տողերի տակ քննիչը ակնարկում է, որ այո, Ծառուկյանը զբաղվում է ձեռնարկատիրական գործունեությամբ, բայց նրան դա օգուտ չի բերում»։
Արսեն Ջուլֆալակյանի հարցով ՔՈ-ն դիմել է Բարձրաստիճան պաշտոնատար անձանց էթիկայի հանձնաժողով: «Մեզ հետաքրքրում է, այն, որ նրա հայտարարագրում նշված չէ, որ բաժնեմաս ունի որևէ սրճարանում և խնդրում ենք հանձնաժողովին պարզել՝ ինչքանով են իր խոսքերը համապատասխանում իրականությանը և ինչքանով է իրականությունը արտացոլվում հայտարարագրում»,- նշեց Սուրեն Սահակյանը։
Մանրամասները՝ տեսանյութում:
Ռոբերտ Անանյան
