16.12.2025 | 15:22
Եվրոպայի առաջնորդները խոստանում են բազմազգ ուժեր ստեղծել Ուկրաինայի համար
Քաղաքացիները դիմել են սադրանքի. Վանեցյանը՝ Բագրատաշենի միջադեպի մասին. ՏԵՍԱՆՅՈՒԹ
Հասարակություն
24.05.2019 | 11:18
Բագրատաշենի անցակետում միջոցառումն իրականացվել է օրենքի համապատասխան, որևէ խախտում Ազգային անվտանգության ծառայության աշխատակիցների կողմից չի եղել: ԱԺ-ում լրագրողների հետ զրույցում այս մասին ասաց ԱԱԾ տնօրեն Արթուր Վանեցյանը՝ անդրադառնալով հայ-վրացական սահմանի Բագրատաշենի անցակետում առևտրականների հետ տեղի ունեցած միջադեպին:
«Հակառակը, քաղաքացիները դիմել են սադրանքների, փորձել են տպավորություն ստեղծել, որ ինքնասպան կլինեն»,- ասաց Վանեցյանը՝ շեշտելով, որ դա սադրանք է որակում:
Նրա խոսքով՝ ՀՀ օրենսդրությամբ՝ յուրաքանչյուր քաղաքացու թույլատրվում է իր հետ առանց մաքսազերծման ՀՀ տարածք ներկրել 25 կգ բեռ. «Մեր քաղաքացիները, որոնք առևտրական նպատակներով պարբերաբար մեկնում են Թուրքիա և ապրանք են բերում, ուղղակի չեն ուզում վճարել մաքսազերծման համապատասխան գումարները: Այդ դեպքը, որը տեղի է ունեցել, խոսքը 20 տոննայից ավելի ապրանքի մասին է, որոնք բերվել են և չեն ուզել վճարել»:
Արթուր Վանեցյանն ասաց նաև, որ իրենց ունեցած տեղեկություններով՝ մաքսային ծառայության որոշ աշխատակիցների ձեռք է բերվել պայմանավորվածություն կաշառքի դիմաց այդ ապրանքները ՀՀ ներմուծելու համար:
«ԱԱԾ-ի կողմից իրականացվել են համապատասխան միջոցառումներ, ֆիքսվել է այդ գործընթացը, անցումը ֆիքսվել է, կասեցվել է և իրականացվել են համապատասխան միջոցառումներ: Եվ մաքսային ծառայության այդ աշխատակիցը, որը մեր կողմից կասկածվում է կաշառք ստանալու մեջ, սովորեցրել է այդ քաղաքացիներին, որ աղմուկ բարձրացրեք, ճանապարհ փակեք, դիմեք ծայրահեղ քայլերի»,- պարզաբանեց ԱԱԾ տնօրենը:
Մանրամասները՝ տեսանյութում:
Շողիկ Գալստյան
