Չեմ հիշում, թե այդ պահին Լևոն Երանոսյանն ինչով էր զբաղված. Օսիպյանը պատասխանում է Երանոսյանին. ՏԵՍԱՆՅՈՒԹ

Օրերս ՀՀ նախկին փոխոստիկանապետ Լևոն Երանոսյանը հայտարարել էր, որ 2018 թվականի ապրիլին իր գործողություններով կանխել է բախումները: Կառավարության այսօրվա նիստից ՀՀ ոստիկանապետ Վալերի Օսիպյանը, որն այդ ժամանակ զբաղեցնում էր Երևանի փոխոստիկանապետի պաշտոնը, լրագրողների հետ զրույցում ասաց՝ Երանոսյանի այդ հայտարարությանը ծանոթ չէ:

«Այդ ընթացքում ոստիկանությունը գործել է իր մասնագիտական գործառույթների սահմաններում, առաջնորդվել է օրենքով: Ինքներդ տեսնում եք արդյունքները»,- ասաց նա:

Դիտարկմանը, թե այդ դեպքում ինչո՞ւ է Լևոն Երանոսյանը քրեական գործով անցնում, եթե ոստիկանությունը գործել է օրինական դաշտում, Օսիպյանն արձագանքեց. «Տեղեկացված չեմ, անկեղծ եմ ասում՝ ես ժամանակ չունեմ, ծանոթանամ՝ կանդրադառնամ»:

Հիշեցնենք, որ Լևոն Երանոսյանը մեղադրվում է ՀՀ քրեական օրենսգրքի 309-րդ հոդվածի 2-րդ մասի 3-րդ կետով: Ըստ նախաքննական մարմնի՝ 2018թ. ապրիլին նա հատուկ միջոցների գործադրմամբ դիտավորությամբ կատարել է այնպիսի գործողություններ, որոնք ակնհայտորեն դուրս են եկել իր լիազորությունների շրջանակից և էական վնաս պատճառել քաղաքացիների իրավունքներին ու օրինական շահերին, ինչպես նաև անզգուշությամբ առաջացրել են ծանր հետևանքներ։

Բացի այդ՝ վերջերս Երանոսյանի ենթադրյալ մասնակցությամբ ծեծկռտուքի դեպքի առիթով հարուցվել է մեկ այլ քրեական գործ՝ ՀՀ քրեական օրենսգրքի 118-րդ հոդվածով:

Մանրամասները՝ տեսանյութում:

Նարեկ Կիրակոսյան