Ռոբերտ Քոչարյանին ազատ արձակած դատավորը շնորհակալություն է հայտնում Նիկոլ Փաշինյանին

ՍԴ նախկին անդամ Կիմ Բալայանի որդին՝ Դավիթ Բալայանը, որը այսօր պատուհանից դատարան մուտք գործելու անհաջող փորձ էր կատարել, Factor.am-ի հետ զրույցում չցանկացավ մեկնաբանել՝ արդյոք դիմում գրելո՞ւ է վարչապետի այսօրվա հորդորից հետո, թե՝ ոչ։

«Սասնա ծռեր» խմբի անդամներից 18-ի գործով դատավոր Արտուշ Գաբրիելյանը մեր հարցը լսելուց հետո ասաց՝ «հիվանդանոցում եմ, հետո զանգեք»։

2018թ. օգոստոսի 13-ին ՀՀ երկրորդ նախագահ Ռոբերտ Քոչարյանին կալանքից ազատ արձակած դատավոր Ալեքսանդր Ազարյանն էլ մեզ փոխանցեց, որ ինքը շարունակելու է իր աշխատանքը, իսկ վարչապետի կոչի մասին ասաց․ «Ես անհեթեթ առաջարկներ, չգիտեմ էլ առաջարկ ասեմ, ուլտիմատում ասեմ, չեմ քննարկում և ուշադրություն էլ չեմ դարձնում։ Շարունակելու եմ իմ աշխատանքը։ Դատավորները քաղաքական գործիչներ չեն։ Ինձ համար միևնույնն է, թե ով է իշխանության, մենք արդարադատություն ենք իրականացնում։ Ինձ համար միևնույնն է՝ անձը հանցագործություն է կատարել Մարտի 1-ին, Հոկտեմբերի 27-ին, թե իմ ծննդյան օրը՝ փետրվարի 10-ին։ Կա գործ, որը քննության առնելով դատարանը որոշում է կայացնում մեղավորության կամ անմեղության մասին»։

Ազարյանը նաև հեգնեց, թե շնորհակալ է վարչապետին․ «Օգտվելով առիթից ցանկանում եմ շնորհակալություն հայտնել մեր վարչապետին դատավորներին ևս մեկ ոչ աշխատանքային օր պարգևելու համար»։

Factor.am-ի հարցին, թե դատավորի կարծիքով դատական համակարգը առողջացնելու անհրաժեշտություն չունի՞, Ազարյանը պատասխանեց, որ առողջացման անհրաժեշտություն ունի, բայց ոչ այնպես, ինչպես ներկայացնում են այսօրվա օրենսդիր և գործադիր իշխանությունները․ «Այնպես չէ, որ այսօր վիճակը շատ ավելի վատ էր, քան երկու տարի առաջ»։

Ի դեպ, դատավորն ասաց, որ վարչապետի ելույթին չի հետևել: «Ես շատ ավելի լուրջ և կարևոր գործեր ունեմ»,- եզրափակեց Ազարյանը։

Լիլիթ Շաբոյան