16.01.2026 | 13:15
Թրամփը հայտարարել է Գազայի հատվածում «Խաղաղության խորհուրդ» ստեղծելու մասին
Հայաստանը թալանած բոլոր անձինք թող գնան, նստեն. վարչապետի ուղիղ եթերից հետո գյումրեցիները բացեցին դատարանի մուտքը
Հասարակություն
20.05.2019 | 15:08
«Հանուն անկախ դատարանի» ակցիայի մասնակիցները Գյումրիում Շիրակի մարզի ընդհանուր իրավասության դատարանի մուտքը փակ պահեցին մինչև վարչապետ Նիկոլ Փաշինյանի ֆեյբուքյան ուղիղ եթերը: Մինչ այդ, մասնակիցները դատարանի մուտքի մոտ հետևում էին Նիկոլ Փաշինյանի դատաիրավական համակարգի բարեփոխումների մասին ելույթին, որը պարբերաբար ուղեկցվում էր ներկաների ծափերով:
Վարչապետի ելույթից հետո ակցիայի մասնակիցներից մեկը, որը Գյումրի էր եկել Թալինից, ասաց, որ արդարություն է պահանջում:
«Ռոբերտ Քոչարյանի ամբողջ անձնակազմը, Մանվել Գրիգորյանի անձնակազմը, որ այսօր ոտնահարում է Հայաստանի Հանրապետության քաղաքացու իրավունքը, ոտնահարում է քաղաքացու արժեքը, արժանապատվությունը, պիտի պատասխան տա: Հայաստանը թալանած բոլոր անձինք թող գնան, նստեն: Չենք բացում ոչ մի դատարանի դուռ, մինչև քաղաքացու խոսքը չանցնի»,- ասաց ակցիայի մասնակից Վալենտին Սահակյանը:
Չնայած եղանակային պայմանների պարբերաբար փոփոխությանը՝ ակցիայի մասնակիցները շարունակում էին մնալ դատարանի մուտքի մոտ: Դատարանի մուտքը որոշվեց բացել միայն Նիկոլ Փաշինյանի ֆեյբուքյան ուղիղ եթերից հետո:
Ընդհանուր առմամբ, «Հանուն անկախ դատարանի» ակցիան անցավ խաղաղ մթնոլորտում, առանց միջադեպերի:
Էմմա Չոբանյան
