16.01.2026 | 20:45
Եպիսկոպոսը դատի է տվել Մայր Աթոռին, կաթողիկոսը՝ սառեցրել թեմի հաշիվները. ՏԵՍԱՆՅՈՒԹ
«Իշխանության 3 ճյուղերից 2-ը՝ գործադիրն ու օրենսդիրը, պատկանում են ժողովրդին, դատականը՝ ոչ». պատգամավոր
Հասարակություն
20.05.2019 | 11:07
«Հանուն արդար դատարանի» ակցիայի գյումրեցի մասնակիցներին միացել է նաև ԱԺ «Իմ քայլը» խմբակցության պատգամավոր Կարեն Սարուխանյանը: Factor.am-ի հետ զրույցում նա նշեց, որ որպես օրենսդիր մարմնի ներկայացուցիչ՝ եկել է ժողովրդի կողքին կանգնելու և սատարելու նրան:
«Մեր Սահմանադրությամբ ամրագրված է, որ ՀՀ-ում իշխանությունը պատկանում է ժողովրդին: Փաստացի վերջին իրադարձություններն ապացուցեցին, որ իշխանության 3 ճյուղերից երկուսը՝ գործադիրն ու օրենսդիրը, պատկանում են ժողովրդին, դատականը՝ ոչ, ինչի հետևանքով ժողովրդի բողոքի ալիք առաջացավ: Իսկ վարչապետը, ընտրված լինելով ժողովրդի կողմից, ներկայացնում է ժողովրդին, կատարում է նրա պահանջը»,- ասաց Կարեն Սարուխանյանը:
Պատգամավորն այս ակցիան համարում է ընթացիկ գործողություն՝ պայմանավորված ժողովրդի մեջ առկա բողոքի ալիքով:
«Այս պահին, որպես դատական համակարգի առողջացման այլ տարբերակ, ես պատկերացնում եմ անցումային արդարադատությունը, որի ուղղությամբ օրենսդիր իշխանությունն աշխատում է: Պետաիրավական հանձնաժողովն այդ դրույթներն է մշակում, մայիսի 24-ին լսումներ են լինելու: Բայց քանի որ վերջին իրադարձությունները շատ արագ էին, և ժողովրդի մոտ բողոքի ալիք բարձրացավ, դրա հետևանքով սա ընթացիկ իրադարձությունն է»,- ասաց նա:
Կարեն Սարուխանյանը վարչապետի կոչը հակասահմանադրական չի համարում:
«ՀՀ-ում իրական իշխանությունը պատկանում է ՀՀ քաղաքացուն: Ժողովրդի ցանկությամբ արվելու է ամեն քայլ, իսկ վարչապետն ընտրվել է ժողովրդի կողմից՝ բացարձակ մեծամասնությամբ»,- ասաց ԱԺ պատգամավորը:
Էմմա Չոբանյան
