12.01.2025 | 11:41
Հրդեհ՝ Հյուսիսային պողոտայի սուպերմարկետներից մեկի պահեստային հատվածում
0038 հրամանը ճիշտ հրաման էր, ճիշտ ժամանակին. Ռոբերտ Քոչարյան․ ՏԵՍԱՆՅՈՒԹ
Հասարակություն
16.05.2019 | 16:40
Երևանի ընդհանուր իրավասության դատարանում շարունակվող Մարտի 1-ի գործով նախնական դատական նիստի ժամանակ Ռոբերտ Քոչարյանը, իր բնորոշմամբ, նկարագրեց այն իրադարձությունները, որոնք տեղի են ունեցել փետրվարի 23-ից մինչև մարտի 1-ն ընկած ժամանակահատվածում։
«Հարգելի՛ դատարան, քանի որ ես ցուցմունք չեմ տվել, այժմ ուղղակի կնկարագրեմ այն ամենն, ինչ կատարվել է փետրվարի 23-ից մինչև մարտի 1-ն ընկած ժամանակահատվածում։ Եվ այսպես, ընտրություններից հետո 21․5 տոկոս հավաքած թեկնածուն հայտարարել էր, որ ինքը ընտրված նախագահ է, ամսի 20-ին արդեն հանրահավաքում Լևոն Տեր-Պետրոսյանի կողմից հայտարարվեց, որ ինքը սյուրպրիզ ունի։ Նա հայտարարեց, որ հանդիպել է պաշտպանության նախարարին և հայտարարվել է, որ միանում են ժողովրդին։ Ես այդ ժամանակ Մոսկվայում էի, և չափազանց մեծ մտահոգություն էր ինձ համար ԵԿՄ-ի այդ շարժմանը միանալու մասին լուրը։ Նշում եմ՝ ոչ միայն Մանվել Գրիգորյանի միանալու մասին լուրն էր մտահոգիչ, այլ հենց ԵԿՄ-ինը։ Ես ընդհատեցի իմ ացը Մոսկվա և փետրվարի 22-ին վերադարձա Երևան։ Հենց օդանավակայանում ինձ զեկուցեցին իրավիճակը, և ես հենց հաջորդ օրը նախագահական նստավայրում հանդիպեցի բարձրագույն զինվորական անձնակազմի հետ»,- մանրամասներ ներկայացրեց Քոչարյանը։
Երկրորդ նախագահի խոսքով՝ ինքը Հայաստան վերադառնալուց հետո հանդիպել էր բարձրագույն զինվորական ղեկավարության հետ, որպեսզի նրանց բացատրի, որ բանակի ներքաշումը կարող է կործանարար լինել պետության համար։
«Հանդիպումը կայացավ փետրվարի 23-ին, այն տևել է 20 րոպե։ Չի եղել քննարկում․ հաղորդակցությունը եղել է միակողմանի, ես իմ մտահոգությունն եմ հայտնել և գնացել։ Առաջին հարցն այն էր, որ հասունանում է ներքաղաքական ճգնաժամ, ուստի մենք պետք է սահմաններին շատ ուշադիր լինենք, որ հակառակորդը չկարողանա օգտվել այդ իրավիճակից։ Ես ինքս, երբ Արցախում էի օգտվել եմ Ադրբեջանում տեղի ունեցող ներքաղաքական իրավիճակից և այդ ընթացքում մենք ազատագրել ենք միանգամից 3 շրջան։ Հաջորդ խնդիրը եղել է հետևյալը՝ ԵԿՄ-ում իրադարձությունները։ Շատ հստակ է եղել հարցը՝ կա՛մ երկրապահ եք, կա՛մ քաղաքական գործիչ»,- նշեց Քոչարյանը՝ շեշտելով, որ զինվորական ղեկավարության հետ հանդիպման ժանանակ բացի այս երկու հարցերի քննարկումից որևէ այլ հարցի քննարկում և հանձնարարական չի եղել։
Քոչարյանը խոսեց նաև 0038 հրամանի մասին և նշեց, որ «0038 հրամանը ճիշտ հրաման էր, ճիշտ ժամանակին»։
Մանրամասները՝ տեսանյութում։
