Քաղաքականություն
16.05.2019 | 12:47Կառավարությունը մայիսի 16-ի նիստում հաստատեց որոշման նախագիծ, որով առաջարկվում է վերանայել տրանսպորտում և ճանապարհային տնտեսության բնագավառում կատարվող վարչական իրավախախտումների համար նախատեսված տույժերի տեսակները և տուգանքների չափերը:
Նախագծով նախատեսվում է վերանայել ճանապարհային երթևեկության ոլորտում թույլ տրվող վարչական իրավախախտումների համար սահմանված տուգանքների չափերը և ներդնել տուգանային (ոչ նյութական) միավորների համակարգ:
Այն միտված է լինելու ճանապարհային երթևեկության ոլորտում թույլ տրվող իրավախախտումների կանխարգելմանը, կարճաժամկետ ժամանակահատվածում երաշխավորելով անվտանգության զգալիորեն բարձր մակարդակ:
Ներկայացվող նախագծի ընդունման և նոր նախատեսվող սանկցիաների կիրառման առաջին 12 ամսվա ընթացքում, պետական բյուջեի մուտքերը, բոլոր հավասար պայմաններում, կարող են նվազել շուրջ 2.7 մլրդ դրամի չափով, որը համեմատության համար վերցված 2016-2018 թթ.-ի միջին տարեկան ցուցանիշի 31,1 %-ն է: Այսպես, 2016-2018 թթ.-ին միայն տվյալ նախագծով նախատեսվող հոդվածներով, տարեկան միջին հաշվով, արձանագրվել է 768.996 իրավախախտում, 8.687.7 մլն դրամ տուգանքների գումարով: Նախագծով նախատեսվող նոր նյութական սանկցիաներ պարունակող հոդվածներով, նկատի ունենալով նաև իրավախախտումների առանձին տեսակների քրեականացումը և տուգանային միավորների (ոչ նյութական սանկցիաների) ներդնումը, Օրենսգրքի կիրարկման միայն առաջին 12 ամսում արձանագրվող իրավախախտումների թիվը կարող է կրճատվել ավելի քան մեկ երրորդով (շուրջ 33 %-ով) կազմելով շուրջ 513.000-514.000 իրավախախտում, շուրջ 6.0 մլրդ դրամ գումարով:
Մանրամասները՝ տեսանյութում։
