Ես կուզեմ՝ Քոչարյանը պնդի, որ տեղյակ չէ 2000-անոց զորքը ինչպես է մայրաքաղաք մտել. Վահե Գրիգորյան. ՏԵՍԱՆՅՈՒԹ

Փաստաբան Վահե Գրիգորյանը չի կարծում, որ Ռոբերտ Քոչարյանի պաշտպանների կողմից գործով դատավորին ինքնաբացարկ հայտնելու միջնորդությունը հիմնավոր էր: Նիստից հետո լրագրողների հետ զրույցում Գրիգորյանը հույս հայտնեց, որ դատարանը կմերժի այդ միջնորդությունը:

«Բոլորդ գիտեք այսօրվա դատավարության կարևորությունը Հայաստանի համար: Փաստացի, ամբաստանյալի աթոռին է Հայաստանի երբեմնի գլուխը՝ երկրորդ նախագահը: Ամբաստանյալներ են նաև հայկական բանակի երկու գեներալներ, բարձրաստիճան մեկ այլ պաշտոնյա: Այս ամենի հետ մեկտեղ նաև պետք է իմանաք, որ ցանկացած փաստաբան, պաշտպան քրեական դատավարության մեջ ներկայացնում է իր պաշտպանյալի դիրքորոշումը, դա իր անձնական դիրքորոշումը չէ»,- ասաց Վահե Գրիգորյանը:

Նրա խոսքով՝ Ռոբերտ Քոչարյանի փաստաբանները բոլորն էլ պրոֆեսիոնալ, բարձրակարգ իրավաբաններ են: «Ես շատ ցավում եմ, որ այս կարևորության և խորության գործը ամբաստանյալ Քոչարյանի կողմից ինչ-որ դռնից մտնելու, մեկ այլ դռնից դուրս գալու օրինականությունը ստուգելու վերածված գործ է դարձել: Մենք ավելի շատ բովանդակային փաստարկներ էինք ակնկալում այսօրվա նիստում և ցավում եմ, որ դրանք չհնչեցին»,- ասաց փաստաբանը:

Դիտարկմանը, թե Քոչարյանը հայտարարել է, որ չի իմացել՝ բանակը ներգրավվել է մարտի 1-ի իրադարձություններին, Վահե Գրիգորյանն արձագանքեց. «Ես կուզեմ, որպեսզի նա հստակ հայկական դատարանում հայտարարի, որ ինքը տեղյակ չի եղել, որ մոտ 2.000 սպայական ու ենթասպայական կազմ ունեցող, բարձր պատրաստվածությամբ, ամբողջությամբ զինված զորաբանակ է բերվել Երևանի կենտրոն, տեղակայվել կենտրոնում և դրա արվարձաններում»:

Մանրամասները՝ տեսանյութում:

Լիլիթ Շաբոյան