10.03.2026 | 19:30
Լավրովն ու Արաղչին հեռախոսազրույց են ունեցել
ՀՀ իշխանությունների համար ընդունելի է Արցախի տարածքի 2/3-ը հակառակորդին հանձնելու թեզը. Արման Մելիքյան
Քաղաքականություն
31.08.2017 | 20:21
Լեռնային Ղարաբաղի Հանրապետության նախկին արտգործնախարար Արման Մելիքյանի կարծիքով՝ ողբերգություն չի կատարվի, եթե ԵԱՀԿ Մինսկի խմբի նախկին համանախագահի հաստիքը կրճատվի:
«Ի վերջո եղել է նախորդող փորձը, եթե հիշողությունս ինձ չի դավաճանում, Եվրասիայում էներգետիկ խնդիրներով հատուկ բանագնաց Ռիչարդ Մորնինգսթարը ևս շատ կարճ ժամանակահատված ստանձնեց ԵԱՀԿ Մինսկի խմբի ամերիկացի համանախագահի պաշտոնը, այնուհետև նշանակվեց Ադրբեջանում ԱՄՆ դեսպան, դրան հաջորդեց Մեթյու Բրայզան, որը ևս Եվրոպայի և Եվրասիայի հարցերով օգնականի տեղակալ էր, դարձավ Մինսկի խմբի համանախագահ, ապա նշանակվեց Ադրբեջանում ԱՄՆ դեսպան»,- Factor.am-ի հետ զրույցում նշեց ԼՂՀ նախկին արտգործնախարար Արման Մելիքյանը՝ անդրադառնալով ԵԱՀԿ Մինսկի խմբի ամերիկացի համանախագահի հաստիքի կրճատման հեռանկարին:
ԼՂՀ նախկին արտգործնախարարն ընդգծեց, որ խնդիրը կոչումը չէ, այլ այն, թե պաշտոնյան ինչ իրական լիազորություններ ունի: «Սրանից ելնելով՝ պետք է որոշվի, թե ինչ է անելու ապագա համանախագահը՝ ամերիկյան, որը միևնույն է մնալու է համանախագահ, միևնույն է ներկայացնելու է Միացյալ Նահանգները Մինսկի խմբում և լինելու է իրավահավասար մյուս նախագահների հետ»,- շարունակեց Արման Մելիքյանը՝ կարծիք հայտնելով, որ հնարավոր փոփոխությամբ գուցե ավելի ճկուն և ներդաշնակ դառնա ամերիկյան քաղաքականությունը տարածաշրջանում:
Ինչ վերաբերում է օրեր առաջ ԵԱՀԿ Մինսկի խմբի ամերիկացի համանախագահ Ռիչարդ Հոգլանդի հրապարակած ԼՂ կարգավորման 6 կետերի վերաբերյալ ՀՀ ԱԳ նախարար Էդվարդ Նալբանդյանի արձագանքին, թե այդ կետերում որևէ վտանգավոր բան չկա, Արման Մելիքյանը պատասխանեց. «Հոգլանդը կրկնում է Մադրիդյան սկզբունքների դրույթները, և ես տեսնում եմ վտանգ հենց Մադրիդյան սկզբունքների մեջ՝ անկախ նրանից դա Հոգլանդն է ասում, Սերժ Սարգսյանը, թե Էդվարդ Նալբանդյանը: Մադրիդյան սկզբունքները խաղաղություն հաստատելու համար հակացուցված են: Պարոն Նալբանդյանը գուցե հանգիստ է, որովհետև իրենք ժամանակին համաձայնել են այդ դրույթներին և շարունակում են, որ այդ դրույթները հայկական կողմի համար ընդունելի են, ընդունելի է Արցախի տարածքի 2/3-ը հակառակորդին հանձնելու թեզը: Մադրիդյան սկզբունքները՝ որպես կարգավորման մեխանիզմ, մեզ համար ընդունելի չեն, դրանք չեն պարունակում տևական խաղաղության ապահովման նվազագույն պոտենցիալ, դրանք պատերազմի վերսկսման պոտենցիալ են պարունակում»:
Արցախի նախկին արտգործնախարարը ընդգծեց, որ Մադրիդյան սկզբունքների շրջանակում Ադրբեջանը կարող է բանակցել կողմերից յուրաքանչյուրի հետ և խոսակցությունը նույնն է լինելու՝ տարածքները պետք է վերադարձվեն, ուրիշ որևէ բան չկա:
«Եթե հայկական կողմը չփորձի իրավիճակը շտկել, ապա առնվազն քաղաքական և իրավական հարթություններում մեր նահաջը, ավելին՝ պարտությունը կարող ենք ապահովագրված համարել»,-եզրափակեց ԼՂՀ նախկին արտգործնախարարը:
Հարզազրույցն ամբողջությամբ՝ տեսանյութում:
Սեդա Ղուկասյան
