ԱԱԾ-ում նեղվում են կասկածներից, տնօրենն ինձ առաջարկել է ՊՎԾ-ի գործը փոխանցել այլ մարմնի․ Փաշինյան. ՏԵՍԱՆՅՈՒԹ

Մեր Կառավարության օրոք չի կարող գործն օբյեկտիվ չքննվել, ես բացառում եմ դա: Այսօր հրավիրված մամուլի ասուլիսում հայտարարեց ՀՀ վարչապետ Նիկոլ Փաշինյանը՝ պատասխանելով ՊՎԾ պետ Դավիթ Սանասարյանի գործի մասին հարցին:

Դիտարկմանը, թե իրավապաշտպանները Դավիթ Սանասարյանի գործն արդեն իսկ կասկածի տակ են դնում, որովհետև դա քննվում է ԱԱԾ-ի քննչական վարչությունում, այլ ոչ ՀՔԾ-ում, վարչապետն արձագանքեց. «ԱԱԾ տնօրենը դեռ սկզբից, երբ պարզ էր, թե գործն ինչ ուղղությամբ է գնում, 2-3 անգամ եկել է ինձ մոտ և ասել՝ խնդրում եմ և առաջարկում եմ, որ այս գործը փոխանցեք Հատուկ քննչական ծառայությանը: Ըստ ամենայնի՝ նաև այն պատճառով, որ ԱԱԾ-ում էլ նեղվում են այդ կասկածներից, որ ոչ օբյեկտիվ է և այլն: Ես ասել եմ՝ դեմ եմ այդ որոշմանը, որովհետև կստացվի, որ մենք Կառավարության ներսում ի վիճակի չենք քննել մեր վերաբերյալ քննվող գործերը: Այսինքն՝ մենք չունենք բավարար քաղաքական կամք, որպեսզի ինքներս մեզ հետ կապված գործերը քննենք»:

Նիկոլ Փաշինյանն ասաց՝ Հայաստանում հեղափոխություն չի եղել, որ իրենք ընկերների և ոչ ընկերների նկատմամբ տարբեր վերաբերմունք ունենան:

«Որ ասում են՝ Դավիթ Սանասարյանն իմ ընկերն է, իմ ընկերն է… Դավիթ Սանասարյանն իմ ընկերն էլ է, ու ի՞նչ: Ես ԱԺ ամբիոնից ասել եմ՝ եթե նույնիսկ իմ ընտանիքի անդամը լինի, ոչ մի նշանակություն չունի: ՀՀ-ում չի կարող լինել ընկերապետություն: Եվ ով դրա տակ ինչ-որ քաղաքական հաշվարկ է փնտրում, չի հասկացել, թե Հայաստանում ինչ է տեղի ունեցել և ինչ է տեղի ունենում»,- ասաց վարչապետը:

Մանրամասները՝ տեսանյութում:

Ռոբերտ Անանյան