Հասարակություն
07.05.2019 | 20:05
Վանաձորի թիվ 18 միջնակարգ դպրոցի տնօրեն Արմեն Մարաբյաը կասկածվում է առանձնապես խոշոր չափերի գումար յուրացնելու մեջ:
Բանն այն է, որ Մարաբյանը 2011 թվականից մինչ օրս աշխատանքի է ընդունել իր մերձավորներին, սակայն վերջններս աշխատանքի չեն հաճախել, և աշխատավարձերի գումարները յուրացվել են:
Նյութերի նախապատրաստման ընթացքում առերևույթ փաստական տվյալներ են ձեռք բերվել այն մասին, որ դպրոցի տնօրենը 2011 թվականի սեպտեմբերի 1-ից առ այսօր՝ դպրոցում աշխատանքի է ընդունել իր աղջկա ամուսնուն: Մինչդեռ վերջինս այլ դրույքով աշխատում է այլ ընկերությունում:
Բացի այդ Ս. Ե.-ին հիշյալ դպրոցում 2014 թվականի հունվարի 1-ից մինչև 2018 թվականի սեպտեմբերի 1-ը ձևակերպել է որպես տեխնոլոգիայի ուսուցիչ, իսկ Մ. Գ.-ին 2016 թվականի մայիսի 11-ից մինչև 2017 թվականի փետրվարի 28-ը դպրոցում ձևակերպել է որպես դաստիարակ:
«Վերջիններիս չաշխատելու հանգամանքը թակցնելու անձնական այլ շահագրգռվածությունից ելնելով, տնօրենն իր ստորագրությամբ վավերացրել է պաշտոնական փաստաթուղթ հանդիսացող իրավաբանական նշանակության փաստեր հավաստող կեղծ աշխատաժամանակի տեղեկագրեր և աշխատանքի հաճախելու վերաբերյալ կեղծ տեղեկություններ է ներառել: Արդյունքում, անհիմն դուրս է գրել առանձնապես խոշոր չափերի համարվող 20 միլիոն 129 հզ. 632 ՀՀ դրամ»,-Factor.am-ի հետ զրույցում տեղեկացրեց ՀՀ դատախազության հանրային կապերի բաժնի պետ Արեւիկ Խաչատրյանը:
Փաստի առթիվ հարուցվել է քրեական գործ, ՀՀ քրեական օրենսգրքի 179 հոդվածի 2-րդ մասի 1-ին կետով, 179 հոդվածի 3-րդ մասի 1-ին կետով և 314 հոդվածի 1-ին կետով:
Տաթևիկ Ղազարյան
