Փաստորեն «Իմ քայլի» պատգամավորը նախապես գիտե՞ր, որ իմ նկատմամբ քրգործ է հարուցվելու․ զարմանալի է․ Դավթաշենի նախկին ղեկավար

2012 թվականից մինչև 2018 թվականը Դավթաշեն վարչական շրջանի ղեկավար աշխատած Ռուսլան Բաղդասարյանն այսօր մամուլից է տեղեկացել, որ իր նկատմամբ հարուցվել է քրեական գործ, իսկ դրա վերաբերյալ ծանուցագիր չի ստացել։

Այս մասին Factor.am-ի հետ զրույցում ասաց Ռուսլան Բաղդասարյանը՝ նշելով, որ քրեական գործի վերաբերյալ կխոսի այն ժամանակ, երբ ստանա համապատասխան գործն ու խորհրդակցի իր փաստաբանի հետ։

Բաղդասարյանը, սակայն, նշեց, որ իր նկատմամբ հարուցված քրգործի հիմքում տեսնում է բոլորովին այլ՝ իրավական հիմքեր չունեցող դրդապատճառներ։

«Դրա պատճառը, վստահ եմ, գործող քաղաքապետի վերաբերյալ իմ ակտիվ քննադատությունն է։ Երբ հայտնի դարձավ, որ Երևանի քաղաքապետարանը պատրաստվում է բարձրացնել քաղաքապետարանի աշխատակիցների աշխատավարձերը, ես իմ ֆեյսբուքյան էջում հարցադրում հնչեցրեցի՝ ինչի՞ համար՝ ի՞նչ մեծ ու դժվար աշխատանք են արել այսօրվա քաղաքային իշխանությունները, որ կրկնակի բարձրացնում են իրենց աշխատավարձերը։ Գրառմանս տակ «Իմ քայլը» խմբակցության պատգամավոր Ալեքսանդր Ավետիսյանն էլ գրել էր․ «Հարմար բառերով մոտ ապագայում իրավապահ մարմինների խոսքը կլսենք»։ Փաստորեն այդ պատգամավորը նախապես գիտե՞ր, որ իմ նկատմամբ քրեական գործ է հարուցվելու, ինչպե՞ս, զարմանալի է»,- ասաց  Բաղդասարյանը։

Վերջինս նաև նշեց, որ եթե քրեական գործի շրջանակում կհիմնավորվի իր մեղավորությունը, պատրաստ է կրել պատասխանատվություն։

Հիշեցնենք, որ ՀՀ ազգային անվտանգության ծառայությունից ոստիկանության ԿՀԴՊ գլխավոր վարչության կոռուպցիայի և տնտեսական գործունեության դեմ ուղղված հանցագործությունների հակազդման վարչությունում օպերատիվ տվյալներ էին ստացվել։

Տեղեկությունների հիման վրա նախապատրաստված նյութերով պարզվել է, որ Երևան քաղաքի Դավթաշեն վարչական շրջանի նախկին ղեկավարի աշխատակազմում, 2009-ից 2018 թվականն ընկած ժամանակահատվածում, տարբեր հաստիքների են հրամանագրվել, բայց փաստացի աշխատանքի չեն հաճախել վարչական շրջանի նախկին ղեկավարի մտերիմները։ Հրամաններով և աշխատանքային պայմանագրով նախատեսված պարտականությունները չկատարելու պարագայում, նրանց անվամբ դուրս է գրվել ընդհանուր 41,720,929 դրամ աշխատավարձ, որը վատնման եղանակով հափշտակվել է։

Աղավնի Սուքիասյան