Ինչո՞ւ լսենք այս ցնդաբանությունը․ Սամվել Բաբայանի գործով ամբաստանյալը՝ մեղադրող դատախազին

Երևան քաղաքի ընդհանուր իրավասության դատարանի Շենգավիթի նստավայրում Մարինե Մելքոնյանի նախագահությամբ շարունակվում է ԼՂՀ ՊԲ նախկին հրամանատար, Արցախի հերոս Սամվել Բաբայանի գործով դատական նիստը:

Այսօրվա նիստում շարունակվում է ապացույցների հետազոտումը: մեղադրող Արամ Արամյանը ընթերցում է գործի անջատված մասով մեղադրյալ Հրաչյա Մայիլյանի ցուցմունքը:

Ըստ մեղադրանքի, Սամվել Բաբայանը 50 հազար դոլար է խոստացել այս գործով մեղադրյալ Սանասար Գաբրիելյանին՝ «Իգլա» տեսակի զենիթահրթիռային համալիր ձեռք բերելու համար: Գաբրիելյանը Վրաստանում գործարար կապեր ունեցող Հրաչյա Մայիլյանի միջոցով գտել է զինատեսակը:

Մինչ մեղադրողը ընթերցում էր նյութերը, գործով ամբաստանյալ Սանասար Գաբրիելյանը տեղից արձագանքեց, որ ինչ իմաստ ունի լսել կեղծիքը․ «Ամեն ինչի սուտ է, ինչո՞ւ պիտի լսենք դա։ Մարդը սուտ ա ասում, մենք տենանք, մենք ձրի ականջ ունե՞նք լսենք ցնդաբանություն»:

Դատավորը նկատողության արժանացրեց Գաբրիելյանին։

Հիշեցնենք, որ առաջին ատյանի դատարանը Սամվել Բաբայանին մեղավոր էր ճանաչել Քրեական օրենսգրքի 38-235-րդ հոդվածի 2-րդ մասով (մի խումբ անձանց կողմից ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը) և 190-րդ հոդվածի 1-ին մասով (Հանցավոր ճանապարհով ստացված գույքն օրինականացնելը (փողերի լվացում) և դատապարտել 6 տարվա ազատազրկման։

Ըստ մեղադրական եզրակացության՝ Սամվել Բաբայանը դրդել է մի խումբ անձանց` նախնական համաձայնությամբ ապօրինի կերպով ռազմամթերք հանդիսացող «Իգլա» տեսակի դյուրակիր զենիթահրթիռային համալիր ձեռք բերելուն, փոխադրելուն և պահելուն, ինչպես նաև՝ փոխարկման արդյունքում ձեռք է բերել հանցավոր ճանապարհով ստացված գույք:

Լիլիթ Շաբոյան