Մանվել Գրիգորյանի պաշտպանը միջնորդեց դռնփակ նիստեր անցկացնել. «գործում առկա են պետական անվտանգությանն անռչվող նյութեր»

Երևանի ընդհանուր իրավասության դատարանի Կենտրոնի նստավայրում շարունակվում է ԱԺ նախկին պատգամավոր Մանվել Գրիգորյանի և նրա կնոջ՝ Նազիկ Ամիրյանի գործով նախնական նիստը, որտեղ քննարկվում է Գրիգորյանի խափանման միջոց կալանավորման հիմնավոր լինել-չլինելու հարցը:

Գրիգորյանի պաշտպաններից Կարեն Քամալյանը միջնորդեց, որպեսզի նիստերն անցկացվեն դռնփակ կարգով, քանի որ գործում կան այնպիսի նյութեր, որոնք պետական անվտանգությանն են առնչվում, մասնավորապես՝ այնտեղ խոսք է գնում զինվորների քանակի մասին:

Նախագահող դատավոր Մնացական Մարտիրոսյանը նշեց, որ այս միջնորդությունը կքննարկի հետագայում՝ դատական քննության նիստի օր նշանակելիս:

Դատավորը հավելեց, որ այսօր ոչ թե քրեական գործի նյութերն են ուսումնասիրում, այլ կալանքի հարցը և միջնորդության քննարկումը տեղի կունենա բուն դատական նիստի մեկնարկին:

Հիշեցնենք՝ 6-րդ գումարման Ազգային ժողովի Հանրապետական խմբակցության նախկին պատգամավորը մեղադրվում է ապօրինի կերպով զենք-զինամթերք պահելու, ավելի քան 101 միլիոն դրամի գույք յուրացնելու, ավելի քան 1 միլիարդ դրամի հարկերի վճարումից խուսափելու, պետական միջոցներից ավելի քան 1 միլիարդ դրամ վատնելու և շորթմամբ 37 միլիոն դրամ արժողությամբ գույքի հափշտակությունը կազմակերպելու համար:

Ըստ մեղադրանքի` Գրիգորյանը կնոջ, որդու և այլ անձանց հետ նախնական համաձայնությամբ, ապօրինի կերպով ձեռք են բերել, փոխադրել և իրենց պատկանող տարածքներում ապօրինի կերպով պահել հրազեն, ռազմամթերք, ակոսափող հրազենի փամփուշտներ, պայթուցիկ նյութեր:

Լիլիթ Շաբոյան