Արմեն Գևորգյանին առաջադրված կաշառքի մեղադրանքի հիմքում միայն Սիլվա Համբարձումյանի ցուցմունքն է․ պաշտպան

Արդեն հրապարակվել է Ռոբերտ Քոչարյանի, Արմեն Գևորգյանի, Սեյրան Օհանյանի և Յուրի Խաչատուրովի գործով համառոտ մեղադրական եզրակացությունը։ Արմեն Գևորգյանին մեղադրանք է առաջադրվել, որ նա մինչև 2008 թվականի ապրիլի 21-ը զբաղեցնելով Հայաստանի նախագահի աշխատակազմի ղեկավարի և Անվտանգության խորհրդի քարտուղարի պաշտոնները, օգտագործելով իր պաշտոնեական դիրքը, խոչընդոտներ վերացնելու և ցուցումներ տալու եղանակով օժանդակել է նախագահ Ռոբերտ Քոչարյանին՝ տապալելու սահմանադրական կարգը։

Բացի այդ, Գևորգյանին առաջադրվել է նաև մեկ այլ մեղադրանք 1 միլիարդ դրամ կաշառք ստանալու դրվագով։ Գևորգյանի պաշտպան Էրիկ Ալեքսանյանը պնդում է, որ առաջադրված մեղադրանքները հիմնազուրկ են:

«Քրեական գործի ողջ նյութերին ծանոթանալուց հետո հերթական անգամ կարող ենք վստահ ասել, որ Արմեն Գևորգյանին առաջադրված մեղադրանքը չի հիմնավորվել։ Կաշառքի դրվագով միայն Սիլվա Հմաբարձումյանի՝ իրարամերժ, մտացածին ցուցմունքներն են»,- ասաց փաստաբանը։

Անդրադառնալով Սահմանադրական կարգի տապալմանը օժանդակելու դրվագին, Էրիկ Ալեքսանյանն ասաց, որ այստեղ ևս մեկ ցուցմունքի հիման վրա է ողջ մեղադրանքը:

«Այս մեղադրանքի հիմքում էլ Վիկտոր Պողոսյանի ցուցմունքն է այն մասին, որ Արմեն Գևորգյանն ազդել է իր եղբոր վրա, մինչդեռ Վալերի Պողոսյանը ցուցմունքով հայտնել է, որ ոչ ոք այդ թվում և Արմեն Գևորգյանն իր վրա ազդեցություն չեն գործադրել»,- նշեց պաշտպանը։

Փաստաբանի պնդմամբ՝ գործի նյութերում չկա որևէ փաստ, որը կհիմնավորի Արմեն Գևորգյանի մասնակցությունը փողերի լվացման գործում։

Այս գործը, հիշեցնենք, մակագրվել է դատավոր Վարդան Գրիգորյանին։ Արմեն Գևորգյանի պաշտպանը Factor.am-ին ասաց, որ նրան ինքնաբացարկի միջնորդություն ներկայացնելու վերաբերյալ դիրքորոշում այս պահին չունեն։

Լիլիթ Շաբոյան