Հասարակություն
29.04.2019 | 21:22
Լոռու մարզի «Վանաձոր» ՔԿՀ-ում նախնական կալանքի տակ գտնվող Դավիթ Ն.-ն դադարեցրել է օրեր առաջ սկսած հացադուլը:
Այս մասին «Ֆեյսբուք» սոցիալական ցանցի իր էջում գրել է ՀՀ գլխավոր դատախազի խորհրդական Գոռ Աբրահամյանը: Դավիթ Ն.-ն, ում քրեական գործով մեղադրանք է առաջադրվել ՀՀ քրեական օրենսգրքի 175-րդ հոդվածի 2-րդ մասի 3-րդ և 4-րդ կետերով(ավազակություն, որը կատարվել է բնակարան, պահեստարան կամ շինություն ապօրինի մուտք գործելով, ինչպես նաև զենքի կամ որպես զենք օգտագործվող այլ առարկաների գործադրմամբ) նախատեսված հանցավոր արարքը ենթադրաբար կատարելու համար և ում նկատմամբ որպես խափանման միջոց է կիրառվել կալանավորումը, 2019 թվականի ապրիլի22-ին ՀՀ ԱՆ «Վանաձոր» ՔԿՀ-ում հայտարարել էր հացադուլ՝ պատճառաբանելով, որ համաձայն չէ առաջադրված մեղադրանքի հետ և անհիմն է համարում իր նկատմամբ կիրառված կալանավորում խափանման միջոցը: Լոռու մարզի դատախազության ավագ դատախազը, ով հսկողություն է իրականացնում տվյալ քրեական գործի նախաքննության օրինականության նկատմամբ, այցելել և հարցման է ենթարկել Դավիթ Ն.-ին և բացատրական աշխատանքների արդյունքում նույն օրը անձը դադարեցրել է հացադուլը:
