Հասարակություն
24.04.2019 | 12:53Հայաստանի Մարդու իրավունքների պաշտպան Արման Թաթոյանի խոսքով՝ Ցեղասպանության ճանաչման հարցում շատ կարևոր է պետական բոլոր կառույցների համակարգված աշխատանքը։
«Իրավական գործընթացն այս հարցում շատ կարևոր է․ մենք համատեղ ունենք միջոցառումներ, երբ Արտաքին գործերի նախարարության հետ ՄԱԿ-ի մարդու իրավունքների խորհրդի կամ այլ հարթակներում բարձրաձայնում ենք այս հարցը։ Պետական մակարդակով ներգավվածություն կար ՄԻԵԴ դատարանում, երբ քննվում էր «Դողու Փերինչեքն ընդդեմ Շվեյցարիայի» գործը, որով Թուրքիան, որպես երրորդ կողմ, խնդիր էր դրել ստիպել ՄԻԵԴ-ին ասել, որ Հայոց ցեղասպանություն տեղի չի ունեցել։ Կարևոր էր, որ եվրոպական դատարանի մակարդակով ամրագրվեց՝ դատարանը չունի իրավասություն՝ ամրագրելու Հայոց ցեղասպանություն տեղի ունեցե՞լ է, թե՝ ոչ, իսկ մյուս կողմից ամրագրվեց նաև, որ Ցեղասպանության զոհերի ժառանգներն ունեն իրենց արժանապատվությունն ու սեփականությունը պաշտպանելու իրավունք»,- ասաց Արման Թաթոյանը։
Factor.am-ի լրագրողը ՀՀ Մարդու իրավունքների պաշտպանից հետաքրքրվեց 2018 թվականի հունվարի 15-ին Երևանից Մարտակերտի N զորամաս զորակոչված զինծառայողի նկատմամբ նույն ամսվա ընթացքում սեքսուալ բնույթի բռնի գործողություններ կատարելու և նրան ծեծելու դեպքով հարուցված քրեական գործի վերաբերյալ։
Ի պատասխան Թաթոյանն ասաց, որ գործին ծանոթ չէ և խոստացավ, որ կզբաղվի Արցախում սպայի կողմից սեռական բռնության ենթարկված զինվորի խնդրով։
Մանրամասները՝ տեսանյութում։
