Ֆլեշի Բարսեղի գործով նոր պաշտպան ներգրավվեց, դատական նիստը հետաձգվեց

Երևանի ընդհանուր իրավասության դատարանի Ավանի և Նոր Նորք նստավայրում Դավիթ Հարությունյանի նախագահությամբ շարունակվեց «Ֆլեշ» ՍՊԸ-ի նախագահ Բարսեղ Բեգլարյանի և «Ֆլեշ» ՍՊԸ-ի բազայի պետ Հրայր Հովսեփյանի գործով դատական նիստը։

Այսօրվա դատական նիստում ուսումնասիրվեց մեղադրողի ապացույցների մի մասը, մյուսը մասը կուսումնասիրվի հաջորդ նիստին։

Երբ դատարանն առաջարկեց պաշտպանական կողմից ներկայացնել իրենց ապացույցները, պաշտպանական կողմը առարկեց՝ «մինչև մեղադրող կողմի ապացույցները չավարտենք, մերը չենք հրապարակի»։

Նիստի ավարտին Բարսեղ Բեգլարյանը հայտարարեց, որ հաջորդ դատական նիստից իր գործով կզբաղվի փաստաբան Վահագն Թորոսյանը։ Վերջինս ասաց՝ գործի նյութերին ծանոթ չէ, ժամանակ է անհրաժեշտ իրեն:

«Պարոն Գրիգորյանը շատ զբաղված ա, կարծում ա, որ իր ներկայության կարիքը չի լինի, Գրիգորյանը երբ կուզենա կգա, չի ուզենա՝ չի գա»,- ասաց Բարսեղ Բեգլարյանը իր ներկայիս պաշտպան Կրոմվել Գրիգորյանի մասին։

Դատարանը որոշեց դատական նիստը հետաձգել, հաջորդ նիստին ուսումնասիրել մեղադրողի ամբողջ ապացույցները։

Հաջորդ դատական նիստը նախնական նշանակվեց մայիսի 6-ին, ժամը 15.30 -ին։

Հիշեցնենք, որ Բարսեղ Բեգլարյանին մեղադրանք է առաջադրվել այն բանի համար, որ նա 2016թ. մարտ-ապրիլ ամիսների ընթացքում Արման Մկրտումյանի նկատմամբ բռնություն գործադրելով, ինչպես նաև կյանքի և առողջության համար վտանգավոր բռնություն գործադրելու սպառնալիքներով կատարել է ինքնիրավչություն` վերջինիս օրինական շահերին պատճառելով էական վնաս: Փաստական տվյալների համաձայն՝ Ն.Բեգլարյանին պատկանող «Ֆլեշ Մոթորս» ՍՊ ընկերությունից 2015թ. ընթացքում իրականացվել է առանձնապես խոշոր չափերի գույքի հափշտակություն, որի կատարման մեջ ընկերության սեփականատերն ու հարազատները մեղադրել են «Ֆլեշ Մոթորս» ՍՊ ընկերության նախկին կոմերցիոն տնօրենին և պահանջել վերականգնել ենթադրաբար պատճառված գույքային վնասը։

Լիլիթ Շաբոյան