15.10.2026 | 15:04
Իսրայելի նախագահը Թուրքիայի օդային տարածքի արգելքը շրջանցելու համար Բաքու է մեկնել AZAL-ի չվերթով՝ անցնելով նաև ՀՀ տարածքով
Հովիկ Աբրահամյանը ևս 2 բիզնես է վաճառել՝ ավազի հանքը և մեկ գազալցակայան. «ՀԺ»
24.08.2017 | 09:39
«Հայկական ժամանակ» թերթը գրում է.
«Armtimes.com-ն օրեր առաջ գրել էր, որ նախկին վարչապետ Հովիկ Աբրահամյանը վաճառել է «Արտֆուդ» ընկերությունում իր ընտանիքին պատկանող բաժնեմասը: Աբրահամյանների կապիտալի արտահոսքի ևս երկու դեպք էլ կա: Պարզվում է, որ Հովիկ Աբրահամյանի եղբորը պատկանող ավազի հանքը նույնպես վաճառվել է այլ անձի:
Մեզ հասած տեղեկությունների համաձայն՝ նախկին պատգամավոր Հենրիկ Աբրահամյանը «Ավազահատիկ» ՍՊԸ-ում իրեն պատկանող 30% բաժնեմասն է վաճառել: Ավազի այս հանքը գտնվում է Արարատի մարզի Նորամարգ գյուղում, իսկ ավազն արդյունահանվում էր հենց Արաքս գետից: Բնապահպանները բազմիցս են ասել, որ գետից ավազի արտահանումը խախտում է գետի բնական հունը և բնապահպանական խնդիրներով լի է արդյունահանման նման եղանակը:
«Ավազահատիկ» ՍՊԸ-ի գործարքից բացի, Արարատի մարզում Աբրահամյաններին պատկանող գազալցակայաններից մեկը նույնպես վաճառվել է: Այս գործարքից առաջ ՊԵԿ-ը ստուգումներ էր իրականացրել մարզի գազալցակայաններում և նրանք, որոնք հարկային դաշտում չեն եղել, փորձել են բերել հարկային դաշտ: Հասկանալով, որ այլևս գերշահույթ հնարավոր չէ ստանալ, Աբրահամյանները որոշել են այդ գազալցակայանը վաճառել:
Armtimes.com-ն ավելի վաղ գրել էր, որ նախկին վարչապետը պատրաստվում է Գերմանիայի Համբուրգ քաղաքում արտադրական ձեռնարկություն հիմնել: Նախորդ ամիս էլ հայտնի դարձավ, որ ԱԺ պատգամավոր Սամվել Ալեքսանյանը ձեռք է բերել Աբրահամյաններին պատկանող «Արտաշատի տրիկոտաժի ֆաբրիկան»:
Առավել մանրամասն՝ թերթի այսօրվա համարում:
