09.06.2026 | 19:44
27 պատռած քվեաթերթիկ վավեր ճանաչվեց․ «Ծալածները համարել են անվավեր ու պատռել». ՏԵՍԱՆՅՈՒԹ
Սեռով պայմանավորված հղիությունների ընդհատումների արդյունքում մինչև 2060 թվականը 93 հազար աղջիկ չի ծնվելու․ Ծովինար Հարությունյան
Հասարակություն
04.04.2019 | 17:12
ՄԱԿ-ի բնակչության հիմնադրամի հայաստանյան գրասենյակի գործադիր ներկայացուցիչ Ծովինար Հարությունյանն, այսօր՝ ապրիլի 4-ին հրավիրած մամուլի ասուլիսում, անդրադառնալով Հայաստանում սեռով պայմանավորված հղիության արհեստական ընդհատումների վիճակագրությանը, նշեց, որ եթե 2013 թվականին 100 աղջկա դիմաց ծնվել է 115 տղա, ապա 2017 թվականին 100 աղջկա դիմաց ծնվել է 110 տղա, իսկ 2018 թվականին՝ 111 տղա:
«Ճիշտ է, մեկ նիշով տարբերություն ենք տեսնում, սակայն մեր նման փոքր երկրներում մեկ նիշը մեկ տարվա կտրվածքով կարող է խաբուսիկ լինել, անհրաժեշտ է ցուցանիշները դիտարկել երկարաժամկետ կտրվածքով: Իսկ երկարաժամկետ կտրվածքով տեսնում ենք, որ ընդհանուր դրական միտումը պահպանվում է»,- ասաց Հարությունյանը՝ նշելով, որ սեռով պայմանավորված հղիությունների ընդհատումների արդյունքում մինչև 2060 թվականը 93 հազար աղջիկ չի ծնվի:
«Եվ այս ֆենոմենի արդյունքում Հայաստանի բնակչությունն է նվազելու: Մեր ուսումնասիրությունները ցույց են տալիս, որ կրթական բարձր ցենզ ունեցող կանայք ավելի շատ են նախընտրում տղա երեխա»,- ասաց Ծովինար Հարությունյանը:
ՄԱԿ-ի բնակչության հիմնադրամի հայաստանյան գրասենյակի գործադիր ներկայացուցիչը նաև հավելեց, որ օրերս ՀՀ կառավարությունում վարչապետ Նիկոլ Փաշինյանի հետ հանդիպմանը ներկայացվել են խնդիրները, կառավարությունը հարցով հետաքրքրված է և ձգտում է օր առաջ հասցեական քայլեր ձեռնարկել՝ ուղղված ժողովրդագրական խնդիրների լուծմանը:
«Առաջիկայում կձևավորվի ժողովրդագրության հարցերի բարելավման ազգային խորհուրդ, կհաստատվի կազմը, կմշակվի նոր գործողությունների ծրագիր»,- ասաց նա։
Ասուլիսին ներկա Աշխատանքի և սոցիալական հետազոտությունների ազգային ինստիտուտի տնօրեն Արման Սարգսյանն էլ հավելեց, որ ուսումնասիրությունները ցույց են տալիս, որ սեռով պայմանավորված հղիության արհեստական ընդհատումների խնդիրն ավելի շատ առկա է մարզերում:
«Ամենացածր գործակիցն արձանագրվել է Շիրակի մարզում, իսկ բարձր գործակից առկա է Գեղարքունիքում, որտեղ տարիներ շարունակ խնդիրը սուր է եղել, սակայն 2017 թվականին զգալի աշխատանքի արդյունքում պատկերը նկատելիորեն փոխվել է դրական առումով: Սեռերի հարաբերակցության բարձր գործակից է առկա նաև Տավուշում, Լոռիում, Արագածոտնի մարզում»,- ասաց Արման Սարգսյանը՝ նշելով, որ սոցիալական խնդիրներով է պայմանավորված այն, որ ընտանիքը քիչ թվով երեխաներ է պլանավորում, և խնդիրը սրվում է, երբ երեխայի սեռին նախընտրություն են տալիս։
