Քաղաքականություն
23.08.2017 | 18:30Իշխանության որակը գնահատվում է ոչ թե խաղաղ պայմաններում, այլ արտակարգ իրավիճակներում: Այս մասին Factor.am-ի հետ զրույցում հայտարարեց իրավապաշտպան Վարդան Հարությունյանը՝ անդրադառնալով «Խոսրովի անտառ» պետական արգելոցում օրեր առաջ բռնկված հրդեհին և դրա հետ կապված ՀՀ արտակարգ իրավիճակների և բնապահպանության նախարարությունների արձագանքին ու կատարած գործողություններին:
«Եթե ամեն ինչ խաղաղ է, նորմալ, այնպես, ինչպես Ֆինլանդիայում, կարելի է չիմանալ՝ ով է իշխանությունը, ինչի համար և ինչ ծրագրեր ունի, ապրել հանգիստ, խաղաղ, զբաղվել սեփական հոգսերով: Բայց արտակարգ իրավիճակներում ի հայտ են գալիս իշխանության որակները, թե որքանո՞վ են պատրաստ դիմակայելու և երբևէ ունեցե՞լ են ցանկություն պատրաստված լինելո՞ւ, թե՞ ոչ»,- ասաց իրավապաշտպանը:
Իրավպաշտպանի համոզմամբ՝ Հայաստանում իշխանություն են ստանում այն անձինք, որոնք կզբաղվեն ոչ թե իրենց բուն գործով, այլ կծառայեն իշխանության վերարտադրությանը: «Նրանք այսպես են համարում՝ եթե իրենց կառույցը կարողացել է ընտրություններին ապահովել որոշակի քանակությամբ ձայն, ուրմեն իրենք լավ են աշխատում, իրենց խրախուսում են, մեդալներ տալիս, ուստի մինչև հաջորդ ընտրությունները կարող են հանգիստ ապրել»,- նկատեց իրավապաշտպանը:
Վարդան Հարությունյանը, հակադարձելով նախարարության պնդումներին, ընդգծում է՝ հարցը ոչ թե հրդեհի ծավալներն էին, այլև նախարարության անկազմակերպվածությունը: «Մեր իշխանական բոլոր կառույցները զբաղված են միայն քաղաքական իշխանության վերարտադրության խնդրով, այլ խնդիր իրենց առջև չկա դրված՝ սկսած բանակից վերջացրած ոստիկանությամբ, արտակարգ իրավիճակների, գյուղատնտեսության և մյուս նախարարություններով»,- հավելեց իրավապաշտպան Վարդան Հարությունյանը՝ տեսակետ հայտնելով, որ «Խոսրովի անտառի» հրդեհի դեպքում էլ հնարավոր է՝ առաջիկայում պարգևատրումներ լինեն, ինչպես եղան Սարի թաղի իրադարձություններից հետո:
Առավել մանրամասն՝ տեսանյութում:
Շողիկ Գալստյան
