Բելառուսի ԱԳ նախարարն առաջարկել է սահմանափակել Հայաստանի հասանելիությունը ՀԱՊԿ գաղտնի փաստաթղթերին

Նպատակահարմար կլինի Հայաստանի համար սահմանափակել ՀԱՊԿ-ի գաղտնի բնույթի փաստաթղթերին հասանելիությունը։ Այս մասին հայտարարել է Բելառուսի ԱԳ նախարար Մաքսիմ Ռիժենկովը, գրում է ՌԻԱ Նովոստին։

«Վստահ եմ, որ սահմանափակվելու է հասանելիությունը որոշ փաստաթղթերի, որոնք առհասարակ գաղտնի բնույթ են կրում»,- Բելառուս-1 հեռուստաալիքի եթերում ասել է պաշտոնյան։

Ռիժենկովը հայտարարել է՝ արդյո՞ք անհրաժեշտ է, իր բնորոշմամբ, «նման պսևդոդաշնակցին այսօր լիարժեք հասանելիություն տրամադրել բավականին գաղտնի բնույթ կրող փաստաթղթերին»։ Նա նաև նշել է, որ, ենթադրաբար, գաղտնի տեղեկատվությունը կարող է օգտագործվել ոչ ի շահ այն երկրների, որոնք իսկապես մտադիր են զարգացնել այս ինտեգրացիոն միավորումը «դրական, համերաշխ և համախմբող ոգով»։

Ռիժենկովն ընդգծել է, որ ոչ թե ժողովուրդը, այլ Հայաստանի բարձրագույն ղեկավարությունն է փոխել երկրի վերաբերմունքը ինտեգրացիոն կառույցներին՝ ՀԱՊԿ-ին և ԵՏՄ-ին անդամակցելու հարցում։ Նա դա անվանել է «պասիվ մասնակցություն», որի պայմաններում Հայաստանն այդ միավորումներից վերցնում է այն, ինչն իրեն ձեռնտու է։

«Սա այդ միավորումներին մասնակցությունից բխող որոշակի գիտելիքների և առավելությունների օգտագործումն է սեփական շահադիտական նպատակներով, որոնք չեն համընկնում ինտեգրացիոն միավորումների նպատակների հետ։ Չէ՞ որ մենք ցանկանում ենք ուժեղ, համերաշխ լինել թե՛ քաղաքական, թե՛ տնտեսական, թե՛ անվտանգության հարցերում։ Ստացվում է նման իրավիճակ, երբ ասում են․ «Ձեզնից կընտրեմ այն, ինչն ինձ հետաքրքրում է՝ գազի և նավթի գները, իմ ապրանքների տեղափոխումը մինչև վերջնական սպառողը, իսկ մնացածը մեզ չի հետաքրքրում»։ Նման վերաբերմունքը չէր կարող աննկատ մնալ»,- ասել է Բելառուսի  ԱԳ նախարարը։

Հիշեցնենք, որ Մոսկվայում կայացած ՀԱՊԿ գագաթնաժողովի մասնակիցները որոշում են կայացրել զրկել Հայաստանին կազմակերպությունում ձայնի, ինչպես նաև կառույցի պատասխանատու պաշտոններում իր ներկայացուցիչներին նշանակելու իրավունքից։

Թարգմանությունը՝ Էմմա Չոբանյանի