02.07.2026 | 14:43
Իրանը զգուշացնում է ԱՄՆ-ին և Իսրայելին Խամենեիի հուղարկավորության արարողությունից առաջ հարձակումների դեմ
Թե՛ գործադիր, թե՛ օրենսդիր իշխանության լեգիտիմությունը շարունակում է մնալ նախկին կառավարման համակարգի տրամաբանության մեջ․ Արթուր Սաքունց․ ՏԵՍԱՆՅՈՒԹ
Քաղաքականություն
02.04.2019 | 13:34
Թեև հեղափոխությունից հետո տրամաբանություն է փոխվել, ունենք ընտրության միջոցով վստահություն ունեցող Ազգային ժողով և Կառավարություն, սակայն նույնը չի կարելի ասել դատական իշխանության վերաբերյալ, և այն մեխանիզմները, որոնք կիրառվում են օրենսդիր և գործադիր իշխանության ձևավորման ժամանակ, դատական իշխանության դեպքում կիրառելի չեն։ Այսօր՝ ապրիլի 2-ին «Գործընկերություն հանուն բաց հասարակության» նախաձեռնության կազմակերպած «Հետհեղափոխական Հայաստան. համակարգային խնդիրների՝ համակարգային լուծումներ» խորագրով քննարկման ժամանակ ասաց իրավապաշտպան Արթուր Սաքունցը՝ նշելով, որ դատական իշխանության բարեփոխումների հարցում պետք են այլ մոտեցումներ։
«Այժմ ունենք մի իրավիճակ, երբ գործադիր իշխանությունը հրապարակավ զերծ է մնում դատական իշխանությանը թելադրելու գործառույթից, սակայն այդ համակարգն ամբողջությամբ չի փոխվել։ Մարդու իրավունքների պաշտպանի նախկին զեկույցը, որտեղ խոսքը գնում է դատական համակարգում կոռուպցիայի մասին, մնում է օրակարգում: Եվ այս վերջին դեպքը՝ կապված դատավորի կալանավորման հետ, փաստում է, որ դատական համակարգը պետք է փրկել, հակառակ պարագայում՝ ամենաբարձր լեգիտիմության պարագայում էլ կձախողվեն բոլոր բարեփոխումները»,- ասաց Սաքունցը՝ հավելելով, «Թե՛ գործադիր, թե՛ օրենսդիր իշխանության լեգիտիմությունը շարունակում է մնալ նախկին կառավարման համակարգի տրամաբանության մեջ. իշխանության տարանջատման և զսպման մեխանիզմը չի փոխվել»։
Ըստ Սաքունցի՝ երբ խոսում ենք տրամաբանության փոփոխությունից, ապա պետք է հիշել, որ այն պետք է արտահայտվի գործառույթների, կառավարման մեխանիզմների փոփոխությամբ: Դա, նրա խոսքով, վերաբերում է և՛ դատախազությանը, և՛ ոստիկանությանը, և՛ ԱԱԾ-ին, և՛ ՔԿՀ-ներին, և՛ ԴԱՀԿ ու փաստաբանական ծառայություններին:
Մանրամասները՝ տեսանյութում։
Աղավնի Սուքիասյան
