13.12.2025 | 22:20
Ֆրանսիան հաղթեց «Մանկական Եվրատեսիլ»-ում
Ապրիլի 1-ի դրությամբ՝ սողանքային երևույթի ակտիվացման մեկ ահազանգ է եղել՝ Սյունիքի մարզից
01.04.2019 | 18:47
Հայաստանի տարածքում ավելի քան 2.500 սողանքային տեղամասեր կան, որոնց մի մասը՝ 70 տեղամաս, որտեղ խնդիրը սուր է, առանձնացված է: Ապրիլի 1-ին հրավիրված ասուլիսում ՀՀ ԱԻՆ Փրկարար ծառայության բնակչության պաշտպանության և աղետների հետևանքների վերացման կազմակերպման վարչության պետի պաշտոնակատար, գնդապետ Տիգրան Գիդաչյանը տեղեկացրեց, որ 2019թ. ապրիլի 1-ի դրությամբ՝ սողանքային երևույթի ակտիվացման մեկ ահազանգ է եղել՝ Սյունիքի մարզից: Նրա խոսքով՝ սողանքների, քարաթափման հետ կապված խնդիրների հիմնական պատճառը ջրերն են՝ գրունտային ջրեր, անձրևաջրեր, առատ ձնհալ:
Ըստ Գիդաչյանի՝ սողանքների տեսանկյունից առավել վտանգավոր գոտիներ են Սյունիքը, Տավուշը, Վայոց ձորը, Լոռին. «Մեր կողմից կանխարգելիչ միջոցառումներ են իրականացվում, աշխատում ենք բնակիչների հետ, հորդորում, որ այդ տարածքներում ջրերի կառավարմանը հատուկ ուշադրություն դարձնեն, առատ չջրեն հողատարածքները: Իհարկե, անձրևները նույնպես իրենց ազդեցությունն ունեն, սակայն բնակիչների կողմից ճիշտ քայլերը նույնպես կարևոր են»:
ԱԻՆ-ը մշակվել և արդեն իրականացնում է աղետների ռիսկի կառավարման պլաններ: Ըստ Տիգրան Գիդաչյանի՝ դրանցում առանձին հատվածով նշված են համայնքին սպառնացող հնարավոր վտանգները, և եթե կան սողանքային, քարաթափման երևույթներ, ապա նախանշված են կոնկրետ միջոցառումներ, գործողություններ, որոնք ուղղված են խնդիրների կանխարգելմանը, հետևանքների նվազեցմանը: Ինչ վերաբերում է սողանքային հատվածներում բնակիչների բնակարանային խնդրին, Քաղաքաշինության կոմիտեի բնակարանային ֆոնդի կառավարման և կոմունալ ենթակառուցվածքների վարչության պետ Արզումանյանի տեղեկացմամբ՝ գոյություն ունի հայեցակարգ, որում ներկայացված են բոլոր խնդիրները: Անդրադառնալով մայրաքաղաքի Սարի թաղի վթարային տների խնդրին՝ Տիգրան Գիդաչյանը նշեց, որ այն նոր չէ, բարձրացվել է Կառավարությունում: Գործադիրի որոշումներով իրականացվել են հատկացումներ՝ վերաբնակեցման կամ օգնություն ցուցաբերելու համար: Տանյա Արզումանյանն էլ հավելեց, որ 2009-2010 թվականներին Սարի թաղում այդ պահի դրությամբ 4-րդ աստիճանի վթարայնության տների բնակիչները վերաբնակեցվել են:
